کورونا کی دوسری لہر؛ خواتین کی تجہیز و تکفین کے لئے خواتین کی ٹیم بھی میدان میں مصروف عمل؛ ہر ضلع میں نیشنل ویمن فرنٹ کی ٹیم محترک
منگلورو: یکم مئی (ایس اؤ نیوز)کووڈ-19سے ہلاک ہونے والی خواتین کی تجہیز و تکفین کو عزت و احترام سے انجام دینے کے لئے نیشنل ویمن فرنٹ کی خواتین اب منظر عام پر آگئی ہیں۔ جیسے ہی اس ٹیم کو پتہ چلتا ہے کہ کسی خاتون کی کورونا سے موت واقع ہوئی ہے اور لوگ متعلقہ کے گھر جانے میں بھی خوف محسوس کررہے ہیں تو یہ ٹیم آگے بڑھ کر متعلقہ گھروالوں کو دلاسہ دیتے ہوئے تمام آخری رسومات کی ادائیگی کررہی ہیں۔ خواتین کی تکفین و تدفین کے لئے خواتین کے ہی آگے آنے پر ہر طرف سے ستائش کی جارہی ہے۔
پتہ چلا ہے کہ گذشتہ سال جب کورونا وباء میں مسلسل اضافہ ہونے کے سبب کئی لوگوں کی ہلاکتیں ہوئی تھیں تو خواتین کی آخری رسومات اسی ٹیم نے انجام دی تھیں۔ اب جب کہ کورونا کی دوسری لہر کا قہر جاری ہے تو یہی خواتین اپنی خدمات کو جاری رکھتے ہوئے دوسروں کو بھی ہمت اور حوصلہ دے رہی ہیں۔ کچھ دن پہلے بنٹوال میں ہلاک ہونے والی بنگلورو کی ایک خاتون کی آخری رسومات بھی اسی ٹیم نے انجام دیاتھا۔ نیشنل ویمن فرنٹ کی صدر زینت نے بتایا کہ جس طرح ضلع دکشن کنڑا کے مختلف تعلقہ جات میں پانچ چھ خواتین پر مشتمل خواتین کی ٹیمیں تشکیل دی گئی ہیں، اُڈپی اور اُترکنڑا میں بھی اسی طرح کی ٹیمیں اپنی خدمات انجام دے رہی ہیں، انہوں نے بتایا کہ ٹیم میں شامل خواتین کو تجہیز و تکفین کی مکمل طور پر تربیت دی گئی ہے۔
زینت نے بتایا کہ مینگلور اور آس پاس کے علاقوں میں کووڈ سے ہلاک ہونےو الے اکثر لوگوں کی آخری رسومات ان کے گھروالوں کے بجائے خود سرکاری انتظامیہ کی طرف سے انجام دیا جارہا تھا۔ لیکن ہم لوگوں کے سامنے آنے کے بعد اکثر لوگ ہمیں اپنی خدمت کرنے کا موقع فراہم کررہے ہیں۔ ہم پوری عزت و احترام اور مذہبی رسومات کے ساتھ خواتین کی تدفین و تکفین کو ادا کرتے ہیں۔
سرکاری گائیڈلائن پر بھی ہم لوگ مکمل طور پر عمل کرتے ہیں اور تجہیز و تدفین کے موقع پر پی پی ای کٹ پہن کر ، پیشگی احتیاطی اقدامات کے ساتھ مذہبی رسومات کو انجام دیاجاتاہے۔ خواتین ٹیم کی ایک ممبر فاطمہ نسیم نے بتایا کہ ہمیں تکفین و تدفین کے متعلق تربیت دی گئی ہے۔ ہماری ٹیم سائنٹفک طریقے سے ہی آخری رسومات کو انجام دے رہی ہیں۔ انہوں نے کہا کہ ساحلی کرناٹک کے تینوں ساحلی اضلاع میں ہماری ٹیمیں متحرک ہیں اور ضلع کے ذمہ داران سے رابطہ کرکے ہمیں کسی بھی وقت خواتین کی آخری رسومات کے لئے یاد کیا جاسکتا ہے۔