بھٹکل 28/جنوری (ایس او نیوز) جمہوری نظام حکومت میں ووٹ کی قیمت اور اہمیت سے نوجوانوں کو آگاہ کرنے کے لئے انجمن ڈگری کالج میں یوم رائے دہندگان(ووٹرس ڈے) منایا گیا۔

انجمن ڈگری کالج کے این ایس ایس یونٹ کی طرف سے منعقدہ اس پروگرام کی صدارت ڈگری اور پوسٹ گریجویٹ سینٹر کے پرنسپال پروفیسر ایم کے شیخ نے کی۔انہوں نے اپنے خطاب میں کہا کہ ووٹ دینے کا حق ہمیں اس ملک کے آئین سے ملا ہے۔ہمیں ذات، فرقہ،علاقہ،مذہب اور زبان کی تفریق کے بغیر ہوش مندی کے ساتھ اس کا استعمال کرنا چاہیے۔ملک کو صحیح انداز میں ترقی کی راہ پرچلانے کے قابل لیڈروں کو اقتدار سونپنا چاہیے۔

 این ایس ایس یونٹ کے کوآرڈینٹر پروفیسر آر ایس نائک نے افتتاحی خطاب کرتے ہوئے کہاکہ 18سال کی عمر کو پہنچنے والے ہرایک شخص کو ووٹر لسٹ میں اپنا نام درج کروانا چاہیے اور ہر مرتبہ لازمی طور پر اپنے ووٹنگ حق کا استعمال کرنا چاہیے۔شہروں اور مضافاتی علاقوں میں الیکشن کے موقع پر پولنگ میں پوری طرح دلچسپی نہ لینے کو افسوسناک اور غیر ذمہ دارانہ عمل قرار دیا۔

 پروفیسر اے ایم ملا نے کہا کہ طلبہ کو اپنا نام ووٹر لسٹ میں داخل کروانے کے علاوہ اپنے آس پاس رہنے والوں کو بھی اس طرف متوجہ کرنا ضروری ہے۔ اور کسی بھی قسم کے لالچ میں آئے بغیر صرف اہل اورقابل امیدواروں کو ووٹ دینا چاہیے۔ یہ ملک کے لئے ایک بڑی خدمت ہوگی۔نیاک کے کورآڈینیٹر پروفیسر ایس اے انڈیکر اور سینئر پروفیسر ایس اے عطار اسٹیج پر موجود تھے۔اجلاس کے آغاز میں طالب علم شریاس نائیک نے استقبال کیا۔ اختتام پر روہت نائک نے شکریہ اداکیا۔ ہریش نائک نے پروگرام کی نظامت کی۔