نئی دہلی،25؍جولائی(ایس او نیوز؍ایجنسی) کانگریس صدر سونیا گاندھی نے آج ایک تقریب کےد وران ہندوستان کے سابق وزیر اعظم پی وی نرسمہا راؤ کی حصولیابیوں و تعاون کو یاد کرتے ہوئے کہا کہ "نرسمہا راؤ کی مضبوط قیادت کے سبب ملک نے کئی چیلنجز کا مقابلہ کامیابی کے ساتھ کیا۔ ان کی حصولیابیوں اور کارکردگی پر پارٹی کو فخر ہے۔"

دراصل آج پی وی نرسمہا راؤ کی یاد میں پیدائش صدی تقریب کا انعقاد عمل میں آیا۔ اس تقریب سے خطاب کرتے ہوئے سونیا گاندھی نے کہا کہ "پی وی نرسمہا راؤ کی پیدائش صدی ہم سبھی کے لیے ایک موقع ہے کہ ہم ایک دانشور شخصیت کو یاد کریں اور انھیں خراج عقیدت پیش کریں۔ ریاستی اور قومی سطح کی سیاست میں طویل سفر طے کرنے کے بعد وہ ایسے وقت ملک وزیر اعظم بنے جب سنگین معاشی بحران تھا۔ ان کی مضبوط قیادت کے سبب ملک کئی سارے چیلنجز کا سامنا کرنے میں کامیاب رہا۔"

یہ بھی پڑھیں : ہندوستانی فوجیوں کو سلام، یہ ملک ان کے ہاتھوں میں محفوظ: سونیا گاندھی

پی وی نرسمہا راؤ کے دور حکومت کو یاد کرتے ہوئے کانگریس صدر نے کہا کہ "24 جولائی 1991 کو پیش کیے گئے بجٹ نے ہمارے ملک میں معاشی تبدیلی کا راستہ ہموار کیا۔ نرسمہا راؤ کے دور میں ملک نے کئی سیاسی، سماجی اور خارجہ پالیسی تیار کی جو ایک بڑی حصولیابی ثابت ہوئی۔ وہ ایک مخلص کانگریسی تھی جنھوں نے مختلف کردار میں پارٹی کی خدمت کی اور ہر طرح کا تعاون کیا۔"

واضح رہے کہ آنجہانی پی وی نرسمہا راؤ کی پیدائش 28 جون 1921 کو ہوئی تھی اور 23 دسمبر 2004 کو ان کا انتقال ہو گیا۔ وہ 21 جون 1991 سے 16 مئی 1996 تک ملک کے وزیر اعظم رہے۔ ان کی یاد میں تلنگانہ کانگریس کمیٹی نے پیدائش صدی تقریب منعقد کرنے کا فیصلہ کیا تھا جس کی سونیا گاندھی نے تعریف کی۔