احمد آباد11دسمبر(ایس او نیوز/آئی این ایس انڈیا) گجرات میں 2002 کے گودھرا فسادات کے بارے میں ناناوتی کمیشن آف انکوائری رپورٹ بدھ کو پیش کی گئی۔وزیرمملکت برائے امورداخلہ پردیپ سنگھ جڈیجا نے اس رپورٹ کو پیش کرنے کے بعد ایک پریس کانفرنس میں کہاہے کہ کمیشن نے فسادات کے دوران وزیراعلیٰ نریندر مودی اور ان کے تین وزرا کو کلین چٹ دے دی ہے۔ اس سے یہ ثابت ہوتا ہے کہ اس کے خلاف لگائے گئے الزامات جھوٹے ہیں۔ یہ مودی اور بی جے پی کو بدنام کرنے کے لیے کانگریس اور کچھ غیر سرکاری تنظیموں کی چال تھی۔گجرات کے وزیر جڈیجا کے مطابق، کمیشن نے فسادات سے متعلق اہم سوالات اور الزامات پر یہ تبصرے کیے ہیں۔کمیشن نے کہاہے کہ گودھرا میں واقع سابرمتی ایکسپریس کاڈبہ سوچی سمجھی سازش کے تحت جلایا گیا تھا، لیکن ریاست میں اس کے بعد کے فسادات پہلے سے منصوبہ بند یا سیاسی طور پرطے شدہ نہیں تھے۔مودی یا اس کے اس وقت کے وزراء اشوک بھٹ، بھرت باروت اور ہیرن پانڈیا کا ان فسادات میں کوئی کردار نہیں تھا۔فسادات میں تین افسران آر بی سری کمار، سنجیو بھٹ اور راہول شرما کے منفی کردار کے ثبوت ملے ہیں۔کمیشن نے یہ بھی کہاہے کہ سابرمتی ایکسپریس کے جلے ہوئے ایس 6 کوچ کوگودھراکانڈ کے بعد ایک صحن میں رکھا گیا تھا۔ مودی وہاں سرکاری دورے پر گئے تھے اور ان کا مقصد ثبوتوں کو ختم کرنا نہیں تھا۔مودی نے صورتحال کا جائزہ لینے کے لیے سی ایم ہاؤس میں ایک میٹنگ طلب کی تھی، لیکن فسادیوں پر کارروائی نہ کرنے کی ہدایت نہیں دی۔