ریاستی بلٹین میں دو دو مرتبہ شائع ہورہے ہیں بھٹکل کے کورونا متاثرین کے نام؛ دونوں کے سیمپل جانچ کے لئے روانہ کئے گئے تھے دوبارہ
بھٹکل 18/مئی (ایس او نیوز) ریاستی حکومت کی طرف سے جاری کی جانے والی ہیلتھ بلٹین میں بھٹکل سے تعلق رکھنےوالے کورونا متاثرین کے نام دو دو مرتبہ شائع ہونے کی بات منظر عام پر آئی ہے ۔ یہ دوسرا موقع ہے جب کورونا سے متاثرہ کے نام دو مرتبہ شائع ہوئے ہیں۔
کل اتوار کو ایک 68 سالہ شخص کی رپورٹ کورونا پوزیٹو بتائی گئی تھی حالانکہ ان کی رپورٹ پوزیٹو آنے کا تذکرہ 9/مئی کی بلٹین میں بھی شائع ہوچکا ہے 9/مئی کی بلٹین میں انہیں P783 کا نمبر دیا گیا تھا جبکہ اتوار کے بلٹین میں انہیں P1147 نمبر دیا گیا ہے۔ بتایا گیا ہے کہ اس سے قبل ان کی دُختر P 740 کی رپورٹ کورونا پوزیٹو آئی تھی جو مریضہ نمبر 659 کے رابطے میں تھی۔
اسی طرح آج پیر کو ایک دو سالہ بچی کی رپورٹ پھر ایک بار ہیلتھ بلٹین میں شائع ہوئی ہے اور میڈیکل ہیلتھ آفسر نے تصدیق کی ہے کہ اس بچی کی رپورٹ بھی دوسری مرتبہ شائع ہوئی ہے۔ یاد رہے کہ اس بچی کی کورونا پوزیٹو آنے کی رپورٹ 13مئی کے ہیلتھ بلٹین میں چھپ چکی ہے اُدھر اس بچی کا فہرست نمبرP 929 ہے، آج پیر کی رپورٹ میں اسے نیا نمبر P 1206 دیا گیا ہے۔
یاد رہے کہ ان دونوں کی رپورٹ کو لے کر ڈاکٹر الجھن کا شکار ہوگئے تھے جس کی وجہ سے دونوں کے سیمپل دوبارہ جانچ کے لئے روانہ کئے گئے تھے،یہی وجہ ہے کہ ان دونوں کی رپورٹ دو دو مرتبہ بلٹین میں چھپ کر آئے ہیں۔
خیال رہے کہ ضلع اُترکنڑا میں کورونا کے ایکٹو معاملات بڑھ کر آج 37 ہوگئے ہیں، جس میں صرف بھٹکل کے 30 معاملات شامل ہیں، اس سے پہلے گلف کنکشن سے آئے بھٹکل اور اُترکنڑا کے گیارہ لوگ صحتیاب ہوکر اسپتالوں سے ڈسچارج ہوچکے ہیں۔
