میسورو،27؍اگست (ایس او نیوز؍ایجنسی)بی جے پی ایسے شخص کو رہنما کے طور پر پیش کررہی ہے  جوبزدل اور غدار تھا۔  یہ بات  ورونا حلقہ سے کانگریس کے رکن اسمبلی یتندر سدارامیا نے  کہی۔انہوں نے  ساورکر  کا نام لے کر بتایا کہ  بی جے پی آج ایسے شخص کو عوام کے سامنے  ایسے پیش کرہی ہے  جس نے گوڈسے کو مہاتما گاندھی کا قتل کرنے کی حوصلہ افزائی کی۔ ساورکر جسے انگریزوں پر حملے کے لیے 50سال قید کی سزا سنائی گئی تھی‘ انگریزوں کو معافی نامہ لکھ کر جیل سے باہر آیا تھا۔

 ننجن گوڈو میں کانگریس کارکنوں کی میٹنگ میں اظہار خیال کرتے ہوئے انہوں نے الزام عائد کیا کہ مہاتما گاندھی کا قاتل گوڈسے بی جے پی کا لیڈر تھا۔  انہوں نے سوال کیا  کہ بی جے پی کے آباواجداد کون ہیں؟ان کے لیڈران کون ہیں، یہ جاننے کے لیے اگر آپ تاریخ کو کنگھالیں گے تو آپ کو پتا چل جائے گا۔“ یتندر نے ساورکر کو تنقید کا نشانہ بناتے ہوئے کہا کہ   اس نے انگریزوں سے وعدہ کیا تھا کہ جب تک وہ یہاں ہیں وہ ان کی خدمت کرتا رہے گا۔ ساورکر وہ شخص تھا جس نے ملک کے ہندوؤں اور مسلمانوں میں خلاء پیدا کیا۔ وہ بزدل اور غدار تھا۔ یتیندر نے کہا کہ بی جے پی  آج اسے اپنے قائد کے طور پر پیش کررہی ہے۔