نائٹ کرفیو: میسور و پولیس پابندیوں کو سختی کے ساتھ لاگوکرنے پوری طرح تیار
میسورو،28؍دسمبر (ایس او نیوز؍ایجنسی) ریاستی حکومت کی جانب سے جاری کووڈ کی نئی گائیڈ لائنس کے تحت بروز منگل 28دسمبر کی رات 10بجے سے نائٹ کرفیو نافذ کردیا جائے گا۔ اس طرح اب ہرروزرات 10 تا صبح 5بجے تک کرفیو جاری رہے گا۔ یہ نیا قانون 7جنوری تک لاگو رہے گا۔ریاستی حکومت کی جانب سے جاری کردہ ان نئی ہدایات کو نافذ کرنے کیلئے شہر میسورو اور میسورو ضلع پولیس پوری طرح تیار ہے۔ ان تمام سخت قوانین کے باوجود 31دسمبر کی رات کو بھی تمام گائیڈ لائنس سختی کے ساتھ لاگوکردئے جائیں گے۔نئے سال کا جشن منانے کیلئے 31دسمبر کو بھیڑ کو جمع ہونے کی ہر گز اجازت نہیں دی جائے گی۔ دکانیں، ہوٹلس، ریسٹورانٹ اور شراب کی دکانوں کو رات 10بجے کے بعد کھلے رکھنے کی ہر گز اجازت نہیں دی جائے گی اور پولیس شہر میں گشت کرتے ہوئے رات 9:30بجے کے بعد تمام دکانیں بند کرانے کی کوشش کرے گی۔ لیکن آن لائن کھانا منگوانے پر کوئی پابندی نہیں رہے گی۔ میسور کے تمام سنیما گھروں کو رات9:30بجے کے بعد بند کردیا جائے گا۔ کسی بھی فنکشن ہال اور شادی محل میں کثیر تعداد میں بھیڑ کو جمع ہونے کی اجازت نہیں دی جائے گی اور 10بجے کے بعد موٹر گاڑیوں کی چہل پہل کو بند کردیا جائے گا۔ نئے سال کا جشن منانے کیلئے 31دسمبر کی رات کو کسی بھی تقریب کو منعقد کرنے اور پٹاخے پھوڑنے کی ہر گز اجازت نہیں دی جائے گی۔ صرف دوائیوں کی دکانیں کھلی رکھنے کی جازت دی جائے گی۔