سدرامیا کی حمایت میں کانگریس کارکنوں کا احتجاجی مظاہرہ
میسورو،23؍اگست (ایس او نیوز) حال ہی میں کورگ ضلع کے مڈکیڑی میں سیلاب متاثرین کو حکومت کی جانب سے کئے گئے راحت کاری کے کاموں کا معائنہ کرنے سابق وزیراعلیٰ سدرامیا کورگ ضلع کے دورے پر گئے ہوئے تھے،اس موقع پر مڈکیڑی میں بھارتیہ جنتا پارٹی کے کارکنوں نے کالی جھنڈیوں کا مظاہرہ کرتے ہوئے ان کی کار پر انڈوں سے حملہ کیا تھا،جس کے خلاف بروز پیر میسور کے مسلم کانگریسی کارکنوں نے سابق کارپوریٹر سہیل بیگ کی قیادت میں احتجاجی مظاہرہ کیا۔
اس موقع پر احتجاجیوں نے سدرامیا کی حمایت میں اور بھارتیہ جنتا پارٹی کے خلاف نعرے لگائے۔ اس موقع پر بھارتیہ جنتا پارٹی کی قیادت والی ریاستی حکومت کو 40%رشوت خور حکومت قرار دیا۔ اس موقع پر سہیل بیگ نے کہا کہ جب بھی ریاست کے مسلمانوں پر کوئی مشکل پیش آتی ہے اوربھارتیہ جنتا پارٹی کے قائدین کی طرف سے مسلم قیادت پر الزام لگایا جاتا ہے، تو سب سے پہلے سدرامیا ان فرقہ پرست قائدین کے خلاف آواز اٹھاتے ہیں اور منہ توڑ جواب دیتے ہیں اور اب جب فرقہ پرستوں نے سدرامیا کی بے عزتی کی تو اس ریاست کے مسلمانوں کا فرض بنتا ہے کہ ہم سب ان کی حمایت میں کھڑے ہوں۔
اس موقع پر کے پی سی سی محکمہ اقلیت کے آرگنائزنگ سکریٹری سید فاروق نے کہا کہ بھارتیہ جنتا پارٹی کے چند قائدین، سابق ریاستی وزیر کے ا یس ایشورپا اور رکن پارلیمان پرتاب سمہا فرقہ پرستی کا زہر پھیلارہے ہیں، اس لئے ریاستی حکومت کو چاہئے وہ ایسے شرپسند وں کے خلاف قانونی کارروائی کریں۔ کارپوریٹر ایوب خان نے کہا کانگریس کے سینئر قائد سدرامیا ریاست کرناٹکا کی اقلیتیوں اور خصوصاً مسلمانوں کی ایک طاقت ہیں۔فرقہ پرستوں نے سدرامیا پر حملہ نہیں کیا ہے بلکہ اس ریاست میں مسلمانوں کی آواز کو دبانے کی کوشش کررہے ہیں۔ہم سب کو سدرامیاکی حمایت میں کھڑے ہونا چاہئے۔
کانگریسی قائدین پشپالتا جگناتھ، سندر کمار، جمیل احمد اشرفی، غیاث احمداکرم، محمد ممتاز احمد، سید فاروق، فیاض، فیروز، ٹیپو، خان، ابراہیم اور دوسرے کئی قائدین اس موقع پر موجود تھے۔احتجاجی مظاہرے کے دوران پولیس کے سخت حفاظتی انتظامات فراہم کئے گئے تھے۔
