نوئیڈا،10؍اگست (ایس او نیوز؍ایجنسی) نوئیڈا کی گرینڈ اومیکس سوسائٹی میں ایک خاتون سے بدتمیزی کرنے والے شری کانت تیاگی کی بیوی انو تیاگی نے بدھ کے روز دعویٰ کیا کہ ان کے شوہر بی جے پی رکن ہیں۔ صحافیوں سے بات کرتے ہوئے انو تیاگی نے الزام عائد کیا کہ بی جے پی رکن پارلیمنٹ مہیش شرما کے اشارے پر ان کے کنبہ کو پریشان کیا جا رہا ہے۔ حالانکہ خاتون کے ساتھ بدتمیزی کے واقعہ کی ویڈیو وائرل ہونے کے بعد بی جے پی رکن پارلیمنٹ مہیش شرما نے شری کانت تیاگی کے بی جے پی رکن ہونے سے انکار کیا تھا۔ اس سلسلے میں شری کانت تیاگی کی بیوی نے آج کہا کہ ’’میرے شوہر بی جے پی رکن تھے۔ یہ پورا ڈرامہ مہیش شرما کے اشارے پر کیا جا رہا ہے۔ انھوں نے پولیس کمشنر کے ساتھ بدسلوکی کی، اس لیے پولیس ہمارے ساتھ برا سلوک کر رہی ہے۔‘‘

انو تیاگی کا کہنا ہے کہ ’’میرے شوہر نے پہلے دن خود سپردگی کر دی ہوتی، لیکن ہم صرف ایک وکیل کا انتظار کر رہے تھے تاکہ ہم مناسب قانونی مدد لے سکیں۔ اگر مجھے پولیس اسٹیشن میں حراست میں نہیں لیا گیا ہوتا تو میرے شوہر نے اگلے دن خود سپردگی کر دی ہوتی کیونکہ میں ایک وکیل کے ذریعہ قانونی مدد مانگ سکتی تھی۔‘‘ انھوں نے یہ بھی دعویٰ کیا کہ شری کانت تیاگی نے خودسپردگی کی تھی، وہ کسی چھاپہ ماری میں نہیں پکڑے گئے ہیں۔ حالانکہ نوئیڈا پولیس نے منگل کو دعویٰ کیا تھا کہ اس نے شری کانت تیاگی کو چھاپہ ماری میں گرفتار کیا ہے۔

انو تیاگی نے الزام عائد کیا کہ ان کے ملازمین کو تھرڈ ڈگری کا ظلم برداشت کرنا پڑا، ساتھ ہی ان کے بچوں کو بھی پریشان کیا جا رہا ہے۔ انھوں نے کہا کہ ’’مجھے جسمانی طور سے حراساں نہیں کیا گیا، لیکن مجھے ذہنی طور پر حراساں کیا جا رہا ہے۔ پولیس نے ہر ممکن طریقے سے غلط روہی اختیار کیا، بھلے ہی میں جانچ میں پورا تعاون کر رہی تھی۔ یوگی جی اب کہاں ہیں؟ کیا میں ایک خاتون نہیں ہوں؟‘‘