بھٹکل اور ساحلی کرناٹکا میں پہلی مرتبہ گھروں میں ہی منائی جارہی ہے عید ؛ کورونا بحران کے سبب دنیا بھر میں پائی جارہی ہے مایوسی
بھٹکل 24/مئی (ایس او نیوز) بھٹکل سمیت ساحلی کرناٹکا بالخصوص اُڈپی، مینگلور اور پڑوسی ریاست کیرالہ میں سنیچر کو 30 روزے مکمل کرنے کے بعد آج اتوار کو عید الفطر منائی جارہی ہے، مگر انسانی تاریخ میں پہلی مرتبہ مسلمان عید گھروں میں ہی منانے پر مجبور ہیں۔ عیدالفطر کے موقع پر اخوت، بھائی چارگی، غم گساری، صلہ رحمی، ایثار و قربانی جیسے اقدار کا مظاہرہ ہوتا ہے لیکن ساری دنیا کورونا وباء سے متاثر ہے جس کے نتیجے میں ساری دنیا اس مہلک وباء سے گھروں میں بند ہے ۔
آج عیدالفطر کے موقع پر لوک ڈاون کے چلتے بھٹکل سمیت پوری ریاست میں کچھ زیادہ ہی سختی نظر آئی اور عوام کو گھروں سے باہر قدم رکھنے بھی نہیں دیا گیا، بتایا جاتا ہے کہ ریاست میں کورونا مریضوں کے دن بدن بڑھتے معاملات کو دیکھتے ہوئے اتوار کو لاک ڈاون میں مزید سختی کے احکامات جاری کئے گئے تھے جس سے اجتماعی نماز تو دور کی بات، دوست احباب، رشتہ داروں سے ملاقاتیں، مصافحہ اور گلے ملنے کی خوشیاں کچھ بھی میسر نہیں ہوسکی، البتہ لوگ گھروں میں بیٹھ کر سوشیل میڈیا اور ٹیلی فون کالس اور وڈیو کالس کے ذریعے ایک دوسرے کو عید کی مبارکبادیاں دیتے ہوئے نظر آئے۔
بھٹکل میں آج عید کے دن جگہ جگہ پولس اور پولس کے بیریکیڈ نظر آئے اور عوام کوایک جگہ سے دوسری جگہ جانے پر پابندی عائد رہی، جس کی وجہ سے راستے اور محلے سنسان اور ویران نظر آئے۔ اُدھر پڑوسی ضلع اُڈپی میں بھی کورونا کے معاملات میں اچانک اضافہ ہونے کی وجہ سے لاک ڈاون میں سختی برتی جانے کی اطلاع موصول ہوئی، اسی طرح مینگلور اور پورے دکشن کنڑا میں بھی لاک ڈاون میں سختی برتی جانے کی خبر ہے۔
عید کے موقع پر دنیا بھر میں ہر طرف مایوسی، بے بسی اور مجبوری کا عالم دیکھا جارہا ہے۔ اس مرتبہ رمضان میں بھی مسلمانوں کو اپنی خوشیاں قربان کرنی پڑیں، پانچ وقت کی نماز سمیت جمعہ نماز بھی گھروں میں ہی ادا کی جارہی تھی، رمضان کی خصوصی تراویح نماز بھی لوگ گھروں پر ہی پڑھنے پر مجبور ہوئے۔ جمعۃ الوداع بھی اس بار ادا نہیں کی جاسکی اور مسجدیں بند رہیں، رمضان کے آخری عشرہ میں ہر سال بھٹکل کے بازاروں میں رونق دکھائی دیتی تھی اور بھٹکل کے دکاندار سال بھر کے انتظار کے بعد رمضان ماہ میں خوب منافع حاصل کرتے ہوئے سال بھر کے نقصان کی بھرپائی کرتے تھے۔مگر اس بار لاک ڈاون کی وجہ سے سب کچھ ٹھپ پڑگیا۔
خبر ہے کہ کل پیر کو ملک کے دیگر علاقوں بالخصوص کاروار، ہبلی اور بنگلور وغیرہ میں عید منائی جائے گی۔
