اُڈپی،16؍مئی (ایس او نیوز) لاوڈ اسپیکر پر اذان کے تعلق سے بات چیت کرتے ہوئے  کرناٹک وقف بورڈ کے چیئرمین این کے محمد شفیع سعدی نے کہاکہ مسلم علمائے کرام سپریم کورٹ کے فیصلے کی روشنی میں اذان پر مناسب فیصلہ کریں گے۔

اخبارنویسوں سے گفتگو کرتے ہوئے  شفیع سعدی نے   بتایا کہ کرناٹک حکومت نے حال ہی میں سرکلر جاری کرکے ان سے مساجد میں لاؤڈ اسپیکر کے استعمال پر عدالت عظمیٰ کے حکم کی تعمیل کرنے کے لئے کہا ہے۔ اس کے تحت صرف صبح کی اذان متاثر ہوگی۔

فی الحال وقف بورڈ نے اس پر کوئی فیصلہ نہیں کیا ہے۔ انہوں نے کہا کہ فیصلہ شریعت سے متعلق ہے۔ آج اور کل جنوبی کنڑا اور اُڈپی اضلاع کے علمائے کرام کے ساتھ بات چیت کے بعد مناسب فیصلہ کیا جائے گا۔

تاہم انہوں نے یہ بھی کہا کہ وقف بورڈ نے گزشتہ سال 17 مارچ کو سرکلر جاری کیا تھا جس میں تمام مساجد کو عدالت عظمیٰ کے حکم کی تعمیل کرنے کے لیے کہا گیا تھا، لیکن ہندو سنتوں کے سامنے یہ کہتے ہوئے تشویش ظاہر کی تھی کہ یہ پابندی صرف اذان کے لیے نہیں، بلکہ مندروں کے لئے بھی نقصاندہ ہے۔

سعدی نے کہا کہ وقف بورڈ دینی مدارس میں قومی ترانہ گانے کا خیرمقدم کرتا ہے، لیکن قوم پرستی اور حب الوطنی اندر سے آنی چاہیے اور اسے مسلط نہیں کیا جانا چاہیے۔ انہوں نے کہا کہ وقف بورڈ کے تحت 1990 مدارس ہیں جہاں قومی ترانہ گایا جاتا ہے لیکن افسوس کہ کچھ عناصر فرقہ وارانہ منافرت پھیلانے کی کوشش کر رہے ہیں۔