بنگلورو، 26/مارچ (ایس او نیوز/ایجنسی) ریاستی حکومت کی طرف سے مسلمانوں کو حاصل4فیصد 2Bریزویشن کو منسوخ کردینے کے فیصلہ سے پیدا شدہ صورتحال کا جائزہ لینے کیلئےسابق مرکزی وزیر اور سینئر کانگریس رہنما ڈاکٹر کے رحمن خان کے دفتر میں سرکردہ سیاسی قائدین کا ایک اجلاس منعقد ہوا جس میں ریاستی حکومت کے غیر منصفانہ فیصلہ کی سخت مذمت کرتے ہوئے حکومت کی طرف سے کی گئی اس نا انصافی کے خلاف قانونی جنگ کا اعلان کیا گیا۔ اس میٹنگ میں شریک قائدین نے اس با ت پر اتفاق کیا کہ ریاستی حکومت کا مسلمانوں کو ان کی سماجی پسماندگی کی بنیاد پر دئیے گئے ریزرویشن کو منسوخ کر دینے کا اقدام غیر آئینی ہے اور اس کو عدالت میں چیلنج کرنے کیلئے بہترین قانون دانوں کی خدمات حاصل کی جائیں گی۔ اس میٹنگ میں ڈاکٹر کے رحمن خان کے علاوہ کرناٹک پردیش کانگریس کمیٹی کے کارگزار صدر سلیم احمد،سابق ریاستی وزیر اور چامراج پیٹ کے رکن اسمبلی ضمیر احمد خان،این اے حارث، رضوان ارشد، نصیر احمد، عبدالجبار، کے پی سی سی شعبہ مواصلات کے کو چیرمین منصور علی خان، کے پی سی سی جنرل سکریٹری جی اے باوا، ایس آر مہروز خان، مدبر احمد خان اور دیگر قائدین موجود تھے۔