بھٹکل: مرڈیشور کے جواں سال عالم دین مولانا عدنان میسور کے قریب سڑک حادثہ میں جاں بحق
بھٹکل 27 جنوری (ایس او نیوز/رئیس احمد گنجام) تعلقہ کے مرڈیشور کے جواں سال عالم دین مولانا عدنان خان ندوی (23) میسور کے قریب پیش آئے سڑک حادثہ میں جاں بحق ہوگئے، انا للہ و انا الیہ راجعون۔
اطلاع کے مطابق مولانا عدنان مرڈیشور مدرسہ تنویر الاسلام میں کل منعقدہ یوم جمہوریہ کی تقریب کی نظامت کے بعد دوپہر کو مینگلور ہوتے ہوئے میسور کے لئے بذریعہ بائک روانہ ہوئے تھے، پتہ چلا ہے کہ رات قریب ڈھائی ، تین بجے کسی سواری سے ٹکرا نے کے نتیجے میں ان کی موت واقع ہوگئی۔
بتایا گیا ہے کہ میسور میں اپنے دوست کی شادی میں شریک ہونے وہ میسور جارہے تھے، جب بس پر ٹکٹ نہیں ملی تو بائک پر ہی روانہ ہوگئے۔ بتایا جارہا ہے کہ انہیں آر سی کیرے ہوتے ہوئے میسور کا روڈ پکڑنا تھا مگر غالباً روڈ مس ہوگیا اور منڈیا۔ بنگلور روڈ پر پہنچ گئے تھے اور اسی روٹ پر آگے بڑھ رہے تھے کہ ناگ منڈل کے قریب حادثہ کا شکار ہوگئے۔ ان کی بائک جس جگہ پڑی ہوئی ملی ہے، قریب میں ہی ایک آٹو رکشہ بھی پایا گیا ہے اور معلوم ہوتا ہے کہ رکشہ اور بائک کی ٹکر ہوئی ہے، مگر موقع واردات پرپہنچنے کے بعد بعض لوگوں نے شک کا اظہار کیا ہے کہ آٹو کی ٹکر سے ان کی موت نہیں ہوئی ہوگی بلکہ کوئی بڑی سواری ان سے ٹکرائی ہوگی اور ٹکر مارکر فرار ہوئی ہوگی۔ اس تعلق سے چھان بین کی جارہی ہے۔
مولانا عدنان مرڈیشور میں محی الدین مسجد میں امامت کےساتھ ساتھ مدرسہ تنویر الاسلام میں استاذ کی حیثیت سے خدمات انجام دے رہے تھے۔ ان کی موت پر مرڈیشور کے عوام میں نہایت رنج و غم کا ماحول چھا گیا ہے۔ پتہ چلا ہے کہ مرحوم مرڈیشور کے معروف یوٹیوب وڈیو نیوز چینل ایم بی نیوز کے لئے اینکرنگ بھی کرتے تھے۔ مرحوم کے تعلق سے بتایا گیا ہے کہ وہ نہایت ملنسار اور نیک نوجوان تھے، اپنے ساتھیوں میں ہر دلعزیز تھے، ہر ایک سے مسکراتے ہوئے ملتے تھے۔ مرڈیشور کے عوام نے ان کی موت پر گہرے دکھ کا اظہار کرتے ہوئے ان کی مغفرت کے لئے دعائیں کی ہیں۔ اللہ انہیں غریق رحمت کرے۔ امین
حادثے کی اطلاع ملتے ہی میسور سمیت مرڈیشور سے ان کے رشتہ دار اور دوست احباب جائے واردات پر پہنچ گئے۔ فی الحال میت پوسٹ مارٹم کے لئے ناگ منڈل سرکاری اسپتال لے جائی گئی ہے، پوسٹ مارٹم اور کاغذی کاروائیوں کے بعد مرڈیشور لائی جائے گی۔ شام سات ، آٹھ بجے تک میت مرڈیشور پہنچنے کی توقع ہے۔