بھٹکل ،18؍ ستمبر (ایس او نیوز) بھٹکل تعلقہ کے  مرڈیشور کی ایک خاتون کی طرف سے پولیس کے پاس درج کروائی گئی شکایت کے مطابق بھٹکل اور مرڈیشور کے کچھ لوگوں نے رقم دوگنی کرنے کے نام پر اس کے ساتھ دھوکہ دہی کی ہے اور اس سے 4.5 لاکھ روپے اینٹھ لیے ہیں ۔

مرڈیشور پولیس اسٹیشن میں بستی کی رہنے والی ہوٹل ملازمہ سریکھا سریپاد مڈیوال کی طرف سے داخل کی گئی شکایت میں کہا گیا ہے اس کے ساتھ  ہوٹل میں ملازمت کرنے والی لیلا وتی  گوپال نائک نے بتایا تھا کہ وہ بھٹکل کے ایک ایسے شخص کو جانتی ہے جو رقم دوگنی کرتا ہے ۔ چونکہ سریکھا کو اپنا  گھر تعمیر کرنے کے لئے رقم کی ضرورت ہے اس لئے وہ اس موقع سے فائدہ اٹھائے ۔ پھر بھٹکل کے مذکورہ شخص نے بھی سریکھا کو رقم دوگنی کرنے کا یقین دلایا ۔ ان پر بھروسہ کرتے ہوئے اس نے 4.5 لاکھ روپے اس شخص کو دئے ۔ لیکن رقم دوگنی کرنے یا دی گئی رقم واپس لوٹانے کا نام نہیں لے رہے ہیں ۔ رقم طلب کرنے پر گالی گلوچ کررہے ہیں ۔ 

سریکھا نے اپنی شکایت میں کہا ہے کہ اس معاملہ میں چار افراد ملوث ہیں اور ان سب نے اس کے ساتھ دھوکہ دہی کی نیت سے رقم اینٹھنے کا کام کیا ہے۔  اس لئے ان کے خلاف کارروائی کی جائے ۔ 

مرڈیشور پولیس نے کیس درج کرلینے کے بعد تحقیقات شروع کی ہے ۔