بھٹکل : مرڈیشور میں 20 جنوری کو منعقد ہوگا رتھ اتسوا : اسسٹنٹ کمشنر نے جاری کیا نیا فرمان
بھٹکل 18/ جنوری (ایس او نیوز) بڑھتے ہوئے کورونا معاملات کا حوالہ دے کر دو تین دن قبل تعلقہ انتظامیہ کی طرف سے تعلقہ کے مرڈیشور میں رتھ اتسوا منانے کی اجازت نہ دینے کا فیصلہ کرنے کے بعد اب اسسٹنٹ کمشنر نے نیا حکم جاری کیا ہے جس کے تحت چند شرائط کے ساتھ رتھ اُتسو تہواریعنی تیر حبّا 20 جنوری کو منانے کی اجازت دی گئی ہے ۔
سمجھا جاتا ہے کہ سیاست دانوں، عوامی نمائندوں اور کاروباری حضرات کی طرف سے رتھ اتسوا پر پابندی کی جو مخالفت کی جارہی تھی اس پس منظر میں تعلقہ انتظامیہ کو اپنا فیصلہ تبدیل کرنا پڑا ہے۔
اب نئے سرے سے جاری کیے گئے حکم کے مطابق رتھ اتسوا کمیٹی ، مندر کمیٹی اور مندر سمیتی اراکین سمیت اجازت نامہ (پاس) حاصل کرنے والے اور کووڈ آر ٹی پی سی آر نگیٹیو رپورٹ رکھنے والے 200 افراد کو ہی رتھ اتسوا کے مقام پر جمع ہونے کی اجازت رہے گی ۔ پاس نہ رکھنے والے عوام اور سیاحوں کو یہاں داخلے کی اجازت نہیں ہوگی ۔ اس کے علاوہ رتھ اتسوا میں پھل ، پھول اور دیگر عطیہ جات پیش کرنے پر بھی پابندی ہوگی ۔ اس موقع پر صرف مذہبی رسومات ادا کی جائیں گی ۔