منگلورو: پولیس کی بروقت کارروائی۔چند گھنٹوں کے اندر22سالہ خاتون کا قاتل گرفتار
منگلورو8/جون (ایس او نیوز) جمعہ کی شام کوکے ایم سی ہاسپٹل منگلورو اتاور کے عقب میں واقع پیئنگ گیسٹ میں 22سالہ خاتون کی لاش برآمد ہوئی تھی جس کے بارے میں پولیس کو شبہ تھاکہ اس کا قتل کیاگیا ہے۔ اس معاملے کو بڑی سرعت کے ساتھ حل کرتے ہوئے پولیس نے سندگی سے مذکورہ خاتون انجنا واسسٹا (۲۲سال) کے قتل کے الزام میں ایک شخص کو گرفتار کرلیا ہے۔
منگلورو پولیس کے بیان کے مطابق گرفتار کیے گئے شخص کا نام سندیپ راتھوڈ ہے اور وہ سندگی تعلقہ کے باگلکوٹ ٹانڈا کا رہنے والا ہے۔مقتولہ انجنا چکمگلورو تعلقہ کے تیریکیرے کی رہنے والی تھی۔ اس نے ایم ایس سی کی تعلیم مکمل تھی۔معلوم ہوا ہے کہ وہ بینکنگ کے امتحان میں شرکت کی ٹریننگ لینے کے لئے منگلور و پہنچی تھی۔انجنا اپنے ایک دوست کے ساتھ یہاں آئی تھی اور ان دونوں نے غلط بیانی سے کام لیتے ہوئے اپنے آپ کو میاں بیوی بتاکر پیئنگ گیسٹ والے ٹھکانے پرقیام کیا تھا۔ پتہ چلا ہے کہ انجنا اپنی عارضی قیام گاہ سے واپس اپنے گاؤں چلی گئی تھی مگر اس کے ساتھی نے اس سے فون پر رابطہ قائم کرکے اسے جمعہ کے دن واپس بلالیا تھا۔لیکن اسی دن شام میں وہ مردہ حالت میں پائی گئی تھی۔
ابتدائی جانچ سے معلوم ہواتھاکہ اس کے گلے میں ٹیلی ویژن کا کیبل باندھ کر اسے ہلاک کیا گیا ہے۔باہر سے قفل لگے کمرے میں انجنا کی لاش پڑی تھی اور اس کا ساتھی سندیپ راتھوڈ جو کہ پولیس سب انسپکٹر کا امتحان دینے کے لئے اس کے ساتھ منگلورو آیا تھا وہ غائب ہوگیا تھا۔
تحقیق کے دوران یہ بات بھی سامنے آئی تھی کہ انجنا کے والدین نے اس کے لئے ایک لڑکا تلاش کرلیا تھا جس کے ساتھ شادی کرنے پر انجنا راضی ہوگئی تھی۔ اور شاید یہی بات انجنا کے قتل کا سبب بن گئی۔
