ممبئی بارش سے ریلوے، ہوائی جہاز کی خدمات متاثر
ممبئی،27/جولائی (ایس او نیوز/ آئی این ایس انڈیا) ممبئی میں شدید بارش کی وجہ سے ہوائی جہاز اور ریل خدمات بری طرح متاثر ہوئی ہیں۔ٹریک پر پانی بھر جانے کی وجہ سے جہاں ٹرین راستے میں ہی پھنس گئی وہیں خراب موسم کی وجہ سے 11 پروازوں کو منسوخ کیا گیا۔بارش کی وجہ سے ریل ٹریفک بری طرح متاثر ہے جہاں ٹریک پر پانی بھرنے کی وجہ سے ’مہالکشمی ایکسپریس‘ تقریباً700 مسافروں کے ساتھ تھانے ضلع میں بدلاپور کے پاس پھنس گئیں۔افسر نے بتایا کہ شدید بارش کی وجہ سے سنیچر کی صبح چمٹولی سے آگے نہیں بڑھ پائی۔ڈپٹی کلکٹرشیواجی پاٹل نے کہاکہ الہاس ندی میں پانی بڑھنے کی وجہ سے چمٹولی میں ٹریک پر پانی بھر گیا اور ’مہالکشمی ایکسپریس‘وہاں پھنس گئی۔مسافر وں کو محفوظ طریقے سے نکال لیا گیا ہے۔انہوں نے کہاکہ ہم نے مسافروں کو ان کی منزل پرپہنچانے کے لیے خصوصی انتظام کرنے کی منصوبہ بندی کی ہے۔مقامی پولیس اور ریلوے سیکورٹی فورس (آر پی ایف)مسافروں کو کھانے کا سامان دے گی۔پرازوں کی بات کریں تو بارش کی وجہ سے 11 پروازوں کو منسوخ کیا گیا اور نو کے راستے تبدیل کئے گئے۔انہوں نے بتایا کہ منسوخ ہوئی پروازوں میں سات ممبئی سے جانے والی اور چار ممبئی آنے والی تھیں۔افسر نے بتایا کہ نو پروازوں کو نزدیکی ہوائی اڈوں کی جانب بھیجا گیا ہے۔