دبئی کے مشہور و معروف تاجر بی آر شیٹی کا منصوبہ۔کمٹہ میں ملٹی اسپیشالٹی ہاسپٹل کا قیام۔کیاجلد پورا ہوگا ضلع کے عوام کا خواب؟!
کاروار 21/ستمبر (ایس او نیوز) ضلع شمالی کینرا میں ایک جدید سہولیات والے اسپتال کی ضرورت بہت شدت سے محسوس کی جارہی ہے۔ ایک عرصے سے اس سلسلے میں تجاویز اور منصوبے مختلف اداروں کی جانب سے زیر غور رہے ہیں۔ ابھی حال ہی میں کینرا مسلم خلیج کاونسل اور بھٹکل مسلم خلیج کاونسل کے ذمہ داران کے علاوہ بھٹکل اور اطراف کے این آر آئی ڈاکٹروں اور مقامی ڈاکٹروں کی ایک مشترکہ کانفرنس بھی اسی موضوع پر منعقد ہوئی تھی اور جدید ترین طبی سہولتیں فراہم کرنے کے سلسلے میں عملی اقدامات کا نقشہ بھی بنایاگیا تھا۔
اب تازہ معلومات کے مطابق دبئی ہیلتھ کیئر کی سہولیات فراہم کرنے کے لئے پہچانے جانے والے مشہور تاجر اور رئیس منگلورو کے رہنے والے بی آر شیٹی نے اس سمت میں قدم آگے بڑھا یا ہے۔ بتایاجاتا ہے کہ وہ 21ستمبر کو بنگلورو میں کمٹہ کے رکن اسمبلی دینکر شیٹی کے ساتھ اپنے اس منصوبے پر بات چیت کرنے کے لئے خصوصی چارٹرڈ طیارے سے پہنچے ہیں۔تاج ویسٹ اینڈ ہوٹل میں اس تعلق سے میٹنگ منعقد کی گئی ہے۔
خیال رہے کہ کچھ مہینوں پہلے سوشیل میڈیا پر ضلع میں سوپر اسپیشالٹی ہاسپٹل قائم کرنے کے موضوع پر سوشیل میڈیا پر زور دار مہم چلائی گئی تھی۔اس پس منظر میں پرنٹ اور الیکٹرانک میڈیا پر بھی اسپتال کی ضرورت واہمیت کو نمایاں طور پر اُجاگر کیاگیا تھا۔کیونکہ اس وقت ضلع شمالی کینرا میں اہم طبی سہولتوں اور ماہر ڈاکٹروں کی کمی کی وجہ سے سنگین معاملات میں مریضوں کو شمالی کینرا کے دوردراز علاقوں سے کبھی اڈپی، منی پال او رمنگلورو کی طر ف لے جانا پڑتا ہے تو کبھی ہبلی، شیموگہ اور گوا کی طرف مریضوں کو منتقل کرنا پڑتا ہے۔اس میں جان بچانے اور مریضوں کو راحت پہنچانے میں کام آنے والا قیمتی وقت دوردراز کے لمبے سفر میں ضائع ہوجاتا ہے۔خاص کرکے جان لیوا سڑک حادثات جب ہوتے ہیں تو زخمیوں کو مناسب ابتدائی طبی امداد نہ ملنے کی وجہ سے کئی بار ہلاکتوں میں اضافہ ہوجاتا ہے۔
معلوم ہوا ہے کہ بی آر شیٹی نے اب کمٹہ میں ملٹی اسپیشالٹی ہاسپٹل کے قیام کا تہیہ کرلیا ہے اور ان کے نمائندوں نے اس علاقے کا دورہ کرنے کے بعد ہلدی پور کے پاس پہاڑی علاقے میں اسپتال کے لئے ضروری ۶ تا ۷ ایکڑ زمین کی نشاندہی کرلی ہے۔اس سے پہلے بھی بی آر شیٹی نے ضلع شمالی کینرا میں ملٹی اسپیشالیٹی اسپتال قائم کرنے میں دلچسپی دکھائی تھی۔ یہ بھی پتہ چلاہے کہ ایک طبقے کی طرف سے انکولہ میں اسپتال قائم کرنے کے لئے بی آر شیٹی پر جنوبی کینرا کے ایک سوامی کی معرفت سے دباؤ بھی ڈالا جارہاتھا۔ لیکن بی آر شیٹی نے عوام اور مریضوں کی سہولت کو سامنے رکھتے ہوئے شمالی کینرا کے وسط میں واقع کمٹہ شہر کو ترجیح دی ہے۔
بتایا جاتا ہے کہ اسپتال قائم کرنے کے لئے بی آر شیٹی گروپ کے نمائندوں نے تین مناسب ترین نجی جگہوں کی نشاندہی کی ہے، اس میں سے ایک مقام پر اسپتال کے قیام کا قطعی فیصلہ رکن اسمبلی کے ساتھ منعقد ہونے والی میٹنگ میں کیا جائے گا۔تقریباً 7ایکڑ احاطے میں قائم ہونے والے اس جدید ترین اسپتال پر 100کروڑ روپے خرچ آنے کا تخمینہ لگایا گیا ہے۔کمٹہ کے رکن اسمبلی دینکر شیٹی نے ضلع میں ملٹی اسپیشالٹی اسپتال کے قیام کا خواب پورا ہونے کی امیدجتاتے ہوئے کہا ہے کہ ہم اس منصوبے کا خوش دلی سے استقبال کرتے ہیں۔
