مسلسل 11 ویں سال بھی امبانی نے نہیں بڑھائی اپنی تنخواہ، 15 کروڑ روپے سالانہ ہے تنخواہ
نئی دہلی ،20/جولائی (ایس او نیوز/آئی این ایس انڈیا) ہندوستان کے سب سے امیر شخص مکیش امبانی نے مسلسل 11 ویں سال بھی اپنی کمپنی ریلائنس انڈسٹریز میں اپنی سالانہ تنخواہ 15 کروڑ روپے برقرار رکھی ہے۔وہیں 31 مارچ 2019 کو ختم ہوئے مالی سال میں کمپنی کے ڈائریکٹرس کی تنخواہ میں اچھا اضافہ ہوا ہے، جن میں ان کے قریبی رشتہ دار نکھل اور ہیتل میسانی بھی شامل ہیں۔آرآئی ایل نے اپنی سالانہ رپورٹ میں کہاکہ چیئرمین اور منیجنگ ڈائریکٹر مکیش امبانی کی تنخواہ 15 کروڑ روپے مقرر کی گئی ہے جو کمپنی میں انتظامی سطح کو متوازن رکھنے کے موضوع میں خود ایک مثال پیش کرتے رہنے کی ان کی خواہش کی عکاسی کرتا ہے۔مکیش امبانی کے مالی سال2018-19 کے اعزازیہ میں 4.45 کروڑ روپے تنخواہ اور بھتے کے طور پر دیے گئے۔ان کی تنخواہ اور بھتہ 2017-18 میں 4.49 کروڑ روپے رہا تھا۔امبانی نے خود ہی اپنا اعزازیہ مستحکم رکھنے کا اکتوبر 2009 میں اعلان کیا۔نکھل اور ہیتل دونوں کو 2018-19 میں 20.57-20.57 کروڑ روپے کا پیکیج دیا گیا۔ایک سال پہلے ان دونوں میں سے ہر ایک کو 19.99 کروڑ روپے ملے تھے۔اسی دوران کمپنی کے ایگزیکٹو ڈائریکٹر پی ایم ایس پرساد کا اعزازیہ 8.99 کروڑ روپے سے بڑھ کر 10.01 کروڑ روپے کیا گیا۔اسی طرح کمپنی کے ریفائنری چیف پون کمار کپل کا اعزازیہ بھی 3.47 کروڑ روپے سے بڑھ کر 4.17 کروڑ روپے تک پہنچ گیا۔