سرسی 27/نومبر (ایس او نیوز) ضمنی اسمبلی انتخابات کی تشہیری مہم پر ضلع شمالی کینرا میں پہنچنے کے بعد سابق وزیر اورموجودہ رکن اسمبلی یو ٹی قادر نے سرسی میں منعقدہ ایک پریس کانفرنس سے خطاب کرتے ہوئے کہا کہ شمالی کینرا کے رکن پارلیمان اننت کمار ہیگڈے کے پاس پارلیمنٹ میں اپنے حلقے کے مسائل پر بولنے کا دم نہیں ہے۔ وہ صرف فرقہ وارانہ نفرت کی آگ بھڑکانے اور اس سے سیاسی فائدہ اٹھانے کاکام کرتے ہیں۔

 یوٹی قادر نے کہاکہ رکن پارلیمان اننت کمار کو آگ لگانے کا کام بند کرکے عوام کے مسائل پر توجہ دینا چاہیے۔ انہوں نے یہ پیشین گوئی بھی کی کہ جنوری کے بعد یعنی ضمنی انتخابات کے نتائج کے بعد ریاست میں بی جے پی کی حکومت باقی نہیں رہے گی۔انہوں نے کہا کہ پاکستانی وزیر اعظم کی نواسی کے جنم دن پر وہاں جاکر بریانی کھانے والا کوئی کانگریسی وزیر اعظم نہیں بلکہ بی جے پی سے تعلق رکھنے والے وزیر اعظم تھے۔ رات دن پاکستان کے خلاف بولنے کے سوا بی جے پی کو ملک کی ترقی اور بھلائی کی کوئی فکرنہیں ہے۔پاکستان کے نام سے خوف دکھاکر ووٹ حاصل کرنابی جے پی اور اس کے رکن پارلیمان اننت کمار کا شیوہ بن گیا ہے۔     بی جے پی کی طرف سے کانگریس پر جو الزام لگایا جاتا ہے کہ اسے پاکستان زیادہ پسند ہے، اس پر پلٹ وار کرتے ہوئے یوٹی قادر نے کہا کہ الیکشن کا دور آتے ہی پاکستان کو جیب میں لے کر پھرنے والی بی جے پی ہے اس سے پتہ چلتا ہے کہ اس کو پاکستان سے کتنا پیار ہے۔ انہوں نے یہ بھی کہا کہ بی جے پی زبان سے اپنے آپ کو سودیشی کہتی ہے لیکن اس کا دل ودیشی ہے۔ اس لئے وہ ملک کی بڑے بڑے سرکاری اداروں کو نجی ہاتھوں میں دے رہی ہے اور ملک کا سرمایہ ہی گروی رکھنے والی ہے۔

 یوٹی قادر نے بھروسہ دلایا کہ ضمنی انتخابات میں کانگریس بڑی تعداد میں جیت درج کرے گی اور نااہل قرار دئے گئے امیدواروں کو شکست کا منھ دیکھنا پڑے گا۔ اس موقع پر ایس کے بھاگوت، ونئے کمار سوراکے، جگدیش گوڈا، دیپک دوڈاورو وغیرہ موجود تھے۔