مناسک حج کا آغاز لبیک اللھم لبیک کے ورد کے ساتھ فرزندان توحید منیٰ میں خیمہ زن، وقوف عرفہ آج

Source: S.O. News Service | By Shahid Mukhtesar | Published on 10th August 2019, 11:15 AM | خلیجی خبریں |

مکہ،10؍اگست(ایس او نیوز؍ایجنسی)”لبیک اللہم لبیک“ کے ورد کے ساتھ جمعہ کی علی الصباح سے مناسک حج کا آغاز ہوگیا-مناسکِ حج کے پہلے دن جمعہ کو لاکھوں کی تعداد میں عازمین مکہ مکرمہ سے 8 کلومیٹر دور مِنیٰ پہنچ چکے ہیں - مِنیٰ میں رات گزارنے کے بعدہفتے کے روز 9 ذو الحجہ(سعودی عرب کی تاریخ) کو صبح فجر کے بعد عازمین حج عرفات کا رخ کریں گے،جہاں حج کا رکن اعظم یعنی ”وقوف عرفہ“ ادا کیا جائے گا-منیٰ میں مناسک حج کا پہلا دن گزارنے کیلئے عازمین نے جمعرات کی رات سے ہی منیٰ روانگی کا آغاز کر دیا تھا- مناسک کا پہلا روز”یوم الترویہ“کہلاتا ہے اور اس روز عازمین حج سنت مصطفی صلی اللہ علیہ وسلم کی پیروی کرتے ہوئے پورا دن منیٰ میں گزارتے ہیں -عازمین جمعہ کا دن منیٰ میں اپنے خیموں ہی میں گزارنے کے بعد حج کا رکن اعظم وقوف عرفہ کیلئے جمعہ کی شب سے ہی عرفات کی جانب روانہ ہوگئے- وہ میدان عرفات میں مسجد نمرہ میں امام صاحب سے خطبہ حج سنیں گے اور نمازِ ظہر اور عصر بیک وقت ایک اذان اور الگ الگ اقامت سے ادا کریں گے- وہ غروب آفتاب تک میدان عرفات میں وقوف کریں گے-اس کے بعد وہ مزدلفہ روانہ ہوجائیں گے اور وہاں پہنچ کر مغرب اور عشاء کی نمازیں ایک وقت میں ایک اذان اور دو اقامتوں کے ساتھ باجماعت یا الگ الگ ادا کریں گے- حجاج مزدلفہ میں رات کھلے آسمان تلے گذارتے ہیں اور رمی جمرات کے لئے 70عدد کنکریاں چنیں گے- حجاج کرام یہاں اپنے رب کے حضور مناجات کے ساتھ سنت کے مطابق آرام بھی کرتے ہیں -حجاج کرام اتوار10 ذی الحجہ کو نمازِ فجر ادا کرنے کے بعد سورج طلوع ہونے تک مناجات کریں گے، وہ اللہ کے حضور گڑگڑا کر دعائیں مانگیں گے- اس عمل کے بعد حجاج کرام عقبہ جمرہ کو کنکریاں مارنے کے لئے منیٰ واپس آجائیں گے اور منیٰ میں حرم کی جانب واقع جمرات کمپلیکس میں صرف بڑے جمرہ یعنی بڑے شیطان کو7 عدد کنکریاں ماریں گے-رمی جمرات کے بعد قربانی کا عمل ہوتا ہے اور قربانی مکمل ہونے کے بعد حجاج کرام حلق یا قصر کروا کر حالت احرام سے باہر آ جاتے ہیں -حج کا آخری فرض طوافِ زیارت ہے- زیادہ تر حجاج منیٰ سے پیدل راستوں کے ذریعے حرم پہنچتے ہیں - حرم پہنچ کر کعبۃ اللہ کا طواف زیارت کرتے ہیں -پھر سعی کے بعد حجاج کرام واپس منیٰ آ جاتے ہیں اوررات منیٰ میں قیام کرتے ہیں - اگلے دو دن یعنی 11 اور 12 ذی الحجہ کو زوال کے بعد تینوں جمرات کو 7، 7 کنکریاں ماری جاتی ہیں - حجاج کرام اپنے مکتب کی ہدایت کے مطابق 12 ذی الحج کو غروب آفتاب سے قبل منیٰ سے واپس جاسکتے ہیں یا 13 ذی الحج کی رمی کے بعد اپنی رہائش گاہوں کی طرف روانہ ہوتے ہیں -واضح رہے کہ دنیا بھر کے مختلف ممالک سے جمعرات تک 20لاکھ سے زائدعازمین حج سعودی عرب پہنچ چکے ہیں - ان میں سب سے زیادہ تعداد انڈونیشیا سے تعلق رکھنے والے عازمین کی ہے- ان کی تعداد ڈھائی لاکھ کے قریب ہے- سعودی وزارت داخلہ کے سرکاری ترجمان میجر جنرل منصور الترکی نے ایک پریس کانفرنس کے دوران باور کرایا کہ کسی بھی فرد یا گروپ کو حج کے عمل میں رخنہ ڈالنے یا حجاج کرام کی سلامتی کو خطرے میں ڈالنے کی اجازت نہیں دی جائے گی-سعودی حکام کی ہدایت کے مطابق منیٰ میں ازدھام سے بچنے اور حجاج کرام کے تحفظ کے لئے انہیں قبل از وقت ان کی جائے قیام عمارتوں سے بسوں کے ذریعے منیٰ کی جانب روانہ کیا گیا -سعودی عرب کی وزارت حج عمرہ نے تمام مسلم ممالک کے حج مشنوں کو منیٰ میں قائم خیمہ بستی کے نقشے پہنچا دیاہے اور حجاج کرام میں منیٰ میں قائم مکاتب کی جانب سے الگ سے کارڈ بھی تقسیم کر دئے گئے ہیں - ان پر حاجی کا نام، بستر نمبر، خیمہ نمبر اور شارع کا نمبر سمیت تمام تفصیل درج ہے تاکہ حجاج کرام کو منیٰ میں قیام کے دوران میں کسی قسم کی دشواری کا سامنا نہ کرنا پڑے-

ایک نظر اس پر بھی

سعودی مُعلم نے ٹِن کو خوبصورت تخلیقی فن پاروں میں تبدیل کردیا

سعودی عرب میں آرٹ ایجوکیشن کے ایک استاد نے ٹِن کی دھات سے تیار کردہ پرانہ اشیاء، کنستر اور ڈبوں کو کاٹ کر انہیں آلات موسیقی ، مشینری اور اسلحہ کے نمونوں کی شکل میں تبدیل کرکے یہ پیغام دیا ہے کہ اس دھات کو ضائع ہونے ہونے کے بجائے اس طریقے سے ری سائیکل کیا جا سکتا ہے۔

تیل بردار جہازوں کو نشانہ بنانا سعودی عرب کی روش نہیں: عادل الجبیر

سعودی عرب کے وزیر مملکت برائے خارجہ امور عادل الجبیر نے زور دیا ہے کہ ایرانی تیل بردار جہاز "سبیٹی" کے ساتھ پیش آنے والے اصل واقعے کو جاننے کے لیے تحمل کا مظاہرہ کیا جائے۔ انہوں نے باور کرایا کہ تہران نے جمعے کے روز بحیرہ احمر میں مذکورہ تیل بردار جہاز کو نشانہ بنائے جانے کی ...

شاہ سلمان نے سعودی عرب میں اضافی امریکی فوج تعیناتی کی منظوری دے دی

سعودی عرب کی سرکاری خبر رساں ایجنسی ’’ایس پی اے‘‘ کے مطابق گذشتہ مہینے مملکت کی تیل تنصیبات پر حملوں کے بعد شاہ سلمان بن عبدالعزیز نے مملکت میں ضروری فوجی آلات کے ساتھ اضافی امریکی فوج تعینات کرنے کی منظوری دی تھی۔

سعودی عرب میں کار اور اونٹ کے درمیان تصادم کی ویڈیووائرل

سعودی عرب میں ایک شہری نے کار اور سڑک عبور کرتے ہوئے اونٹ کے درمیان تصادم کی ویڈیو سوشل میڈیا پر جاری کی ہے۔ فوٹیج میں ایک مصروف شاہراہ سے اونٹوں کو گذرتے دیکھا جا سکتا ہے تاہم اس واقعے میں اونٹ کو معمولی زخم آئے اور وہ بچ گیا۔

ایمنسٹی انٹرنیشنل کا یمن میں تمام گرفتار شدگان کی رہائی کا مطالبہ

انسانی حقوق کی بین الاقوامی تنظیم ایمنسٹی انٹرنیشنل نے مطالبہ کیا ہے کہ یمن میں تمام گرفتار شدگان کو رہا کیا جائے اور جبری طور پر روپوش کر دیے جانے والوں کے انجام کا انکشاف کیا جائے۔ایمنسٹی کی جانب سے یہ مطالبہ حال ہی میں قیدیوں اور مغویوں سے متعلق کیس کھولے جانے کے پس منظر میں ...