ہائی وے سے گذرنے کے دوران ہوشیار؛ کہیں چٹان آپ پر گر نہ پڑے؛ ہوناور میں پیش آیا ایسا ہی ایک واقعہ
بھٹکل 11/جون (ایس او نیوز) نیشنل ہائی وے پر سے گذرنے کے دوران عوام بالخصوص چھوٹی گاڑی والوں اور بائک والوں کو بہت زیادہ ہوشیار رہنے کی ضرورت ہے کیونکہ بارش کے موسم میں اچانک کسی پہاڑی پر سے چٹان کا حصہ کھسک کر گرسکتا ہے جس سے جان سے بھی ہاتھ دھونا پڑسکتا ہے۔ یہ اس لئے کہنا پڑرہاہے کیونکہ آج جمعرات صبح ہوناور نیشنل ہائی وے پر ایک ایسا ہی واقعہ پیش آیا ہے جہاں ایک بائک سوار چٹان کی زد میں آتے آتے بال بال بچ گیا ہے۔
ہوناور سے ملی اطلاع کے مطابق ہوسٹن کراس کے قریب نیشنل ہائی وے پر گریش نائک (30) اپنی بائک پر سوار گذررہا تھا کہ اچانک قریبی پہاڑی سے چٹان کا ایک حصہ سیدھے اس کے قریب آکر گرگیا اور بعد میں بائک سے ٹکراگیا، گریش بائک سے نیچے گرپڑا، مگر اسے معمولی چوٹیں آئیں اور وہ بال بال بچ گیا، البتہ اس کی بائک کو کافی نقصان پہنچا ہے۔
تازہ واردات کے بعد مقامی لوگوں نے نیشنل ہائی وے فورلائن کی تعمیر کرنے والے آئی آر بی کمپنی کو اس لاپرواہی کا ذمہ دار قرار دیا ہے، جوہائی وے کی توسیع کرنے کے دوران پہاڑیوں کو غیر سائنٹیفک طریقے پر کاٹ رہے ہیں مگر اس کو درست نہیں کررہے ہیں۔ بارش کے موسم میں پہاڑی کے نیچے سے گذرنا گویا جان کو ہتھیلی پر لے کر گذرنے کے مترادف بن گیا ہے۔ عوام ضلعی انتظامیہ پر زور دے رہے ہیں کہ وہ اس تعلق سے ضروری حفاظتی اقدامات کریں۔
گذشتہ سال بھی اسی طرح کا ایک واقعہ ہوناور کے ساتھ ساتھ کمٹہ میں بھی پیش آیا تھا، جبکہ اُس سے قبل ایسی ہی واردات کاروار نیشنل ہائی وے پر بھی پیش آئی تھی.
