نئی دہلی،27؍جنوری(ایس او نیوز؍ایجنسی) یوم جمہوریہ کے موقع پرمنعقدہ ٹریکٹر ریلی کے دوران کسانوں کی تحریک نے زبردست احتجاج کیا۔ منگل کے روزبے قابوہجوم لال قلعہ کمپلیکس میں داخل ہوا اور وہ جھنڈا اپنے ساتھ لایاتھا۔

کانگریس کے رہنما اور سابق مرکزی وزیر ششی تھرور نے اس طرزعمل پر کڑی تنقید کی ہے۔ انہوں نے کہاہے کہ اگرچہ وہ کسانوں کی تحریک کی حمایت میں ہیں ، لیکن وہ تشددکوبرداشت نہیں کرسکتے ہیں۔ششی تھرور نے ایک ٹویٹ میں لکھاہے کہ بہت افسوسناک ہے۔میں نے احتجاج کے آغاز سے ہی کسانوں کی حمایت کی ہے لیکن میں افراتفری کو برداشت نہیں کرسکتا۔ اور یوم جمہوریہ کے موقع پر کوئی جھنڈا نہیں ، لال قلعے پر صرف ترنگالہرایاجاناچاہیے۔

شیوسینا کی لیڈر اور ممبر پارلیمنٹ پرینکا چترودی نے بھی اس واقعے کی مذمت کرتے ہوئے کہا ہے کہ جمہوریت میں کسی بھی طرح کا تشدد قابل برداشت نہیں ہے۔ پرینکا چترویدی نے ٹویٹ کیاہے کہ لال قلعے پر ہونے والے مظاہروں کی پریشان کن تصاویر قابوسے باہر ہوگئیں۔ کسی بھی حالت میں ترنگے کے تئیں بے عزتی برداشت نہیں کی جاسکتی ہے۔جمہوریت میں کسی بھی طرح کی تشدد کو قبول نہیں کیا جاسکتا۔ قانون سب سے اوپرہے۔ کوئی فریق نہیں جیتا ، ملک ہارگیا۔ جمہوریت کے لیے افسوسناک دن۔