بھٹکل میں آج 6 کی رپورٹ کورونا پوزیٹیو؛ بیندور کے دو بھائیوں کامینگلور میں انتقال؛ بھٹکل میں بھی غم کی لہر
بھٹکل 27 جولائی (ایس او نیوز) آج پیر صبح کوملنے والی اطلاع کے مطابق بھٹکل تعلقہ میں چھ لوگوں کی رپورٹ کورونا پوزیٹیو آئی ہے جس میں پانچ کا تعلق وینکٹاپور سے اور ایک شرالی الوے کوڈی سے ہے۔
ذرائع سے ملی اطلاع کے مطابق شرالی الوے کوڑی کے 40 سالہ شخص کی رپورٹ کوویڈ پوزیٹیو آئی ہے، اسی طرح وینکٹاپور سے تعلق رکھنے والے جن پانچ لوگوں کی رپورٹ پوزیٹیو آئی ہے، اُس میں41 اور 32 سالہ مرد، 19 اور 43 سالہ عورت اور ایک 12 سالہ لڑکا شامل ہیں۔
بیندور کے دو بھائیوں کا مینگلور میں انتقال: پڑوسی ضلع اُڈپی کے بیندور تعلقہ کے دو بھائیوں کی ایک کے بعد ایک موت ہونے کی اطلاع موصول ہوئی ہے۔ جس سے نہ صرف بیندور بلکہ بھٹکل میں بھی غم اور افسوس کی لہر دوڑ گئی ہے۔
ان کے ایک قریبی رشتہ دار نے بتایا کہ 82 سالہ تاراپتی ابومحمد صاحب کو سنیچر کو دل میں درد کی شکایت ہونے کی وجہ سے پہلے کنداپور لے جایا گیا، وہاں بتایا گیا کہ بدن میں اکسیجن کی کمی ہے اس لئے منی پال، پھر اُڈپی اور آخر میں مینگلور لے جایا گیا، مگر کل اتوار شام کو وہ چل بسے۔ انا للہ و اناالیہ راجعون
ان کے ہی چھوٹے بھائی 77 سالہ تاراپتی محمد حُسین کو لیور، کھانسی اور بلغم کی شکایت تھی، ایک ہفتہ قبل یعنی آخری پیر کو سانس لینے میں بھی تکلیف ہونے سے جانچ کرنے کنداپور اسپتال لے گئے تھے، وہ چل پھر کر بالکل صحت مند تھے خود چل کر ایمبولنس پر سوار ہوئے تھے، انہیں گذشتہ پیر کو منگلور لے جایا گیا تھا اور اکسیجن کم ہونے کی بنا پر پرائیویٹ اسپتال میں آئی سی یو میں داخل کئے گئے تھے۔ آج پیر صبح انتقال کرگئے۔ انا للہ و اناالیہ راجعون۔
خبر ملی ہے کہ مرحوم ٹی محمد حُسین صاحب کی رپورٹ کافی روز پہلے کورونا پوزیٹیو آئی تھی، اب انتقال کے بعد دوبارہ سیمپل جانچ کے لئے لئے گئے ہیں، جبکہ بڑے بھائی کے سیمپل بھی جانچ کے لئے روانہ کئے گئے ہیں، دونوں کی رپورٹ کا انتطار ہے۔
بتایا گیا ہے کہ دونوں کی اگر رپورٹ شام تک نیگیٹیو آتی ہے تو پھر میت بیندور لائی جائے گی، رپورٹ پوزیٹیو آنے کی صورت میں مجبوراً مینگلور میں ہی تدفین کرنی پڑے گی۔ اللہ دونوں کی مغفرت فرمائے اور اہل خانہ کو صبر جمیل عطا فرمائے۔ اٰمین