بھٹکل 7 جولائی (ایس او نیوز) اُترکنڑا میں کورونا کے معاملات میں روز بروز اضافہ کا سلسلہ جاری ہے اور آج منگل کو بھی ضلع کے مختلف تعلقہ جات سے 36 کورونا کے معاملات سامنے آئے ہیں جس میں صرف بھٹکل سے پھر ایک بار سب سے زیادہ  یعنی 19 معاملات سامنے آئے ہیں۔ کاروار میں 6،  ہلیال میں 3،  کمٹہ، ہوناور اور سرسی  میں  دو، دو اور منڈگوڈ اور جوئیڈا میں ایک ایک کی رپورٹ پوزیٹیو آئی ہے۔

بھٹکل میں آج جو19 معاملات سامنے آئے ہیں اس میں دس لوگ مریض نمبر 17121 کے پرائمری رابطے  والے ہیں، دبئی سے آئے ہوئے تین لوگ اور مہاراشٹرا کے تھانہ سے آئی ہوئی ایک 32 سالہ خاتون اور پونے سے آیا ہوا ایک 24 سالہ نوجوان کی بھی رپورٹ  پوزیٹیو آئی ہے۔ مریض نمبر 17017 کے رابطے میں آنے والے دو لوگوں کی بھی رپورٹ کورونا پوزیٹیو آئی ہے۔

اُترکنڑا میں کورونا سے دوسری موت:  کل پیر کو  کاروار میں سرسی سے تعلق رکھنے والے ایک 42 سالہ شخص کی موت واقع ہوگئی جس کے تعلق سے بتایا گیا ہے کہ وہ 4 جولائی کو بنگلور سے سرسی آیا تھا،  اتوار کو جب اس کی طبعیت بگڑ گئی تو اسے  سرسی کے نجی اسپتال میں داخل کیا گیا تھا، اس دوران اس کے تھوک کے نمونے جانچ کے لئے روانہ کئے گئے تو رپورٹ کورونا پوزیٹیو موصول ہوئی، جس کے بعد پیر صبح اسے کاروار اسپتال منتقل کیا گیا اور  وینٹی لیٹر پر رکھا گیا مگرعلاج کارگر نہیں ہوا اور شام ہونے تک فوت ہوگیا۔اس موت کے ساتھ ہی اُترکنڑا میں کورونا سے مرنے والوں کی تعداد بڑھ کر دو ہوگئی ہے۔