نئی دہلی13جون (ایس او نیوز/ آئی این ایس انڈیا) دہلی پولیس کی اقتصادی جرائم کے شعبہ نے بدھ کی رات شراب کاروباری پونٹی چڈھا کے بیٹے من پریت عرف مونٹی کو گرفتار کر لیا۔ اس پر سستی شرح پر فلیٹ دلانے کا جھانسہ دے کر 100 کروڑ روپے سے زیادہ کی ٹھگی کا الزام ہے۔ ذرائع نے بتایا کہ مونٹی کو اندرا گاندھی بین الاقوامی ہوائی اڈے سے پکڑا گیا۔ اس وقت وہ تھائی لینڈ فرارہونے کی فراق میں تھا۔ای او ڈبلیو  کے اے سی پی، سواشیش چودھری نے بتایا کہ مونٹی ایپل-چڈھا ہائی ٹیک ڈویلپرز پرائیویٹ لمیٹڈ کا ڈائرکٹر ہے۔ یہ کمپنی شمالی ہند کے کئی شہروں میں فلیٹ بنا کر بیچتی ہے۔ دھوکہ دہی کے معاملے میں مونٹی کے خلاف لک آؤٹ نوٹس جاری کیا گیا تھا۔ چڈھا  فیملی 2006 میں غازی آباد میں ویو سٹی نام کا پروجیکٹ لے کر آیا تھا۔ گاہکوں کو بتایا تھا کہ 1500 ایکڑ میں پھیلے اس پروجیکٹ میں اسکول، سوئمنگ پول، کلب، ہسپتال اور ہیلی پیڈ جیسی سہولیات ہوں گی۔ 18 ماہ میں فلیٹ دینے کا وعدہ کر کے کروڑوں روپے لے کربکنگ کر الی گئی؛ لیکن 2011 تک کوئی تعمیراتی کام نہیں ہوا۔ اس کے بعد گاہکوں کی شکایت پر دہلی پولیس نے مونٹی اور اس کمپنی سے وابستہ لوگوں کے خلاف دھوکہ دہی کا کیس درج کیا۔ پونٹی چڈھا کا نومبر 2012 میں دہلی کے چھتر پور فارم ہاؤس میں قتل کر دیا گیا تھا۔ اس دوران فارم ہاؤس میں پونٹی اور اس کے چھوٹے بھائی کے لوگوں کے درمیان جائیداد تنازعہ کو لے کر فائرنگ ہوئی تھی۔اس کے بعد 19 سال کی عمر میں مونٹی نے باپ کے ویو گروپ کی کمان سنبھالی۔ اس گروپ کے کئی مال، ویو سنیما اور ریئل اسٹیٹ کا کاروبار ہے۔