ایک ہفتہ تاخیر سے ہی سہی بالاخر مانسون کیرالہ کے ساحل سے ٹکراگیا
نئی دہلی 8/جون (ایس او نیوز) ایک ہفتہ کی تاخیر کےبعد بالاخر مانسون آج سنیچر کو کیرالہ کے ساحل سے ٹکرا گیا اور اس کی آمد کے ساتھ ہی کیرالہ کے کئی علاقوں میں زبردست بارش شروع ہوگئی ہے۔ امکان ہے کہ جاریہ ماہ کے آخر تک مانسون ملک بھر میں سرگرم ہو جائے گا۔ محکمہ موسمیات کی طرف سے جاری پریس ریلیز میں بتایا گیا ہے کہ کیرالہ اور لکشدیپ میں ماہی گیروں کو سمندر میں نہ جانے کی صلاح دی گئی ہے۔
جنوب-مغربی بحر عرب، لکشدیپ، خطہ مالدیپ، جنوب مشرقی بحر عرب اور خلیج منار میں 35-45 کلومیٹر فی گھنٹہ کی رفتار سے تیز ہوائیں چلنے کا امکان ہے۔ پریس ریلیز کے مطابق موسم خراب ہونے کی وجہ سے ریاست کے ماہی گیروں کو 9، 10 اور 11 جون کو سمندر میں نہ جانے کی صلاح دی گئی ہے۔
کیرالہ آفات انتظامی اتھارٹی (کے ڈی ایم اے) کے مطابق جنوب-مغرب مانسون کی آمد کے پیش نظر ریاست کے مختلف اضلاع میں 9 سے 11 جون تک ریڈ الرٹ اور آرینج الرٹ جاری کیا گیا ہے۔
