مودی کے پارلیمانی حلقہ میں لگے پوسٹر، حکومت تحفظ فراہم کرے، گھروں میں بیٹیاں ہیں
وارانسی10جون (ایس او نیوز/آئی این ایس انڈیا) اترپردیش میں مسلسل بڑھ رہی بیٹیوں اور ننھی کلیوں کے ساتھ درندگی کے واقعات کی مخالفت میں وزیر اعظم نریندر مودی کے پارلیمانی حلقہ وارانسی میں ایک سو سے ز ائد گھروں کے باہر پوسٹر لگا کر حکومت سے اپیل کی گئی ہے کہ بیٹیوں کو محفوظ ماحول دیا جائے۔ یہ پوسٹر علاقے میں بحث کا موضوع بن گیا ہے۔ پوسٹر پر لوگوں نے لکھا ہے کہ حکومت تحفظ دے، گھروں میں بیٹیاں ہیں۔گزشتہ دس دن میں علی گڑھ، ہمیر پور، جالون، گونڈا، بارہ بنکی، کانپور سمیت کئی اضلاع میں نابالغ بچیوں کے ساتھ زیادتی اور ان کے قتل کے معاملے سامنے آئے ہیں۔ ان واقعات کو لے کر جہاں سیاست گرم ہے، وہیں لوگوں میں بھی پولیس انتظامیہ اور حکومت کے خلاف غم و غصہ ہے۔ سابق کونسلر روی کانت وشوکرما نے بتایا کہ علی گڑھ کے واقعہ نے سب کو جھنجھوڑ کر رکھ دیا ہے، ننھی سی جان کے ساتھ وحشیانہ سلوک ہوا ہے، وہ ہر کسی کو رلادیتا ہے۔ حکومت کے تئیں لوگوں میں غصہ ہے جو پوسٹر میں دکھائی دے رہا ہے۔ پونم شرما نے کہا کہ، حکومت ایسے تو سننے سے رہی، پوسٹر ایک علامتی احتجاج ہے۔ ہمارے گھروں میں بیٹیاں ہے، وہ کیا باہر محفوظ ہیں؟ یہ آج کا بڑا سوال ہے۔ حکومت لوگوں کو بھروسہ دلائے۔ چندریش نے بتایا کہ حکومت نے ”بیٹی بچاؤ بیٹی پڑھاؤ‘ منصوبہ پر کروڑوں روپے خرچ پھونک ڈالے؛لیکن یہ تمام منصوبہ بندی کاغذ تک ہی محدود ہے۔