پٹنہ،24؍ستمبر(ایس او نیوز؍ایجنسی) کانگریس جنرل سکریٹری اور پارٹی کے میڈیا سیل انچارج رندیپ سنگھ سرجے والا نے جمعرات کو پٹنہ میں زرعی بلوں کو لے کر مرکزی حکومت اور حکومت بہار کے خلاف محاذ کھولتے ہوئے کہا کہ مودی جی اور نتیش بابو قسم کسانوں کی کھاتے ہیں اور دوستی مٹھی بھر سرمایہ داروں سے نبھاتے ہیں۔ سرجے والا نے ریاستی کانگریس دفتر صداقت آشرم میں کہا کہ تین سیاہ قوانین کے ذریعہ سے سبز انقلاب کو شکست دینے کی یہ بی جے پی کی سازش ہے۔

بہار کانگریس کے ذریعہ چلائی جا رہی مہم 'بہار کرانتی سمیلن' میں حصہ لینے پٹنہ پہنچے سرجے والا نے کہا کہ "آج ملک بھر میں 62 کروڑ کسان، مزدور اور 250 سے زائد کسان تنظیمیں ان سیاہ قوانین کے خلاف آواز اٹھا رہی ہیں، لیکن پی ایم نریندر مودی جی اور جے ڈی یو حکومت ملک کو ورغلا رہے ہیں۔" انھوں نے کہا کہ نتیش کمار نے کھیتی کو برباد کرنا شروع کیا اور آج پوری طرح سے تباہ کر کے رکھ دیا ہے۔

سرجے والا نے کہا کہ ملک میں کورونا، سرحد پر چین اور کھیتی پر مودی حکومت حملہ آور ہیں۔ کسان مخالف یہ تجربہ نتیش بابو کی قیادت میں سال 2006 میں بہار میں شروع کیا گیا تھا۔ سرجے والا نے سوالیہ لہجے میں کہا کہ "اگر اناج منڈی، سبزی منڈی نظام یعنی اے پی ایم سی پوری طرح سے ختم ہو جائے گا، تب زرعی پیداوار خرید نظام بھی پوری طرح ختم ہو جائے گا۔ ایسے میں کسانوں کو ایم ایس پی (کم از کم حمایت قیمت) کیسے ملے گی، کہاں ملے گی اور کون دے گا؟"

کانگریس جنرل سکریٹری نے کہا کہ یہ تینوں آرڈیننس وفاقی ڈھانچے پر سیدھے سیدھے حملہ ہیں۔ کھیتی اور منڈیاں آئین کے 7ویں شیڈیول کے تحت علاقائی اختیارات کے شعبہ میں آتے ہیں، لیکن مودی حکومت نے ریاستوں سے رائے لینا تک مناسب نہیں سمجھا۔ زراعت کا تحفظ اور فروغ فطری طور سے ریاستوں کا موضوع ہے، لیکن ان قوانین پر ان کی کوئی رائے نہیں لی گئی۔

علاوہ ازیں کانگریس لیڈر اور راجیہ سبھا رکن پارلیمنٹ اکھلیش سنگھ نے خبر رساں ادارہ آئی اے این ایس کے ساتھ خصوصی بات چیت میں کہا کہ وبا کی آڑ میں مودی حکومت 'کسانوں کی آفت' کو 'سرمایہ داروں کے لیے موقع' کی شکل میں دستیاب کروا کر کسانوں کے ساتھ جو سلوک کر رہی ہے، اسے ملک کے کسان کبھی نہیں بھولیں گے۔ انھوں نے کہا کہ کانگریس کسانوں کے حق کی لڑائی پارلیمنٹ سے شروع کر سڑکوں پر لے آئی ہے۔

اکھلیش سنگھ نے مزید کہا کہ کانگریس کسانوں کے ساتھ کندھے سے کندھا ملا کر کھڑی ہے اور اس لڑائی کو آخری دم تک لڑے گی۔ 'بہار کرانتی سمیلن' مہم کے لیے منعقد پریس کانفرنس میں کانگریس کے بہار انچارج شکتی سنگھ گوہل، راجیہ سبھا رکن پارلیمنٹ اکھلیش سنگھ اور کانگریس کے ریاستی صدر مدن موہن جھا بھی موجود رہے۔