سنگاپور:14/نومبر(ایس او نیوز/آئی این ایس انڈیا)وزیر اعظم نریندر مودی نے بدھ کو سنگاپور کے وزیراعظم لی سین لونگ سے ملاقات کی۔ دونوں رہنماؤں نے مالیاتی ٹیکنالوجی میں تال میل اور علاقائی اقتصادی اتحاد سمیت کئی مسائل پر بات چیت کی۔ مودی نے فنٹیس فیسٹیول سے خطاب کر کے بدھ کو دو روزہ سنگاپوردورہ کا آغاز کیا ۔یہ فیسٹیول مالیاتی ٹیکنالوجی پر دنیا کا سب سے بڑا پروگرام ہے۔ اس کی شروعات 2016 میں ہوئی۔ یہ اس کا تیسرا سالانہ ایونٹ ہے۔

وزیر اعظم مودی خطاب کرنے والے عالمی سطح کے پہلے رہنما ہیں۔ وزارت خارجہ کے ترجمان رویش کمار نے ٹویٹ کیا کہ وزیر اعظم نریندر مودی نے مشرقی ایشیا سمٹ سے الگ سنگاپور کے وزیراعظم لی سین لونگ سے ملاقات کی۔دونوں کے درمیان مالیاتی ٹیکنالوجی میں تال میل، وسیع رابطے اور علاقائی اقتصادی اتحاد پر مثبت گفتگو ہوئی۔ اس دورہ کے دوران مودی مشرقی ایشیا سمٹ، آسیان۔بھارت غیر رسمی اجلاس اور علاقائی اقتصادی شرکت کانفرنس میں شرکت کریں گے۔مودی نے سنگاپور کے لیے روانہ ہونے سے پہلے نئی دہلی میں کہا تھا کہ آسیان۔بھارت اجلاس اور مشرقی ایشیا سمٹ میں ان کی شرکت سے آسیان ارکان کے ساتھ رابطہ بڑھانے اور وسیع ہند۔ پیسیفک کے شعبہ میں بھارت کے عزم کا پتہ چلتا ہے۔ انہوں نے اس بات کا بھی بھروسہ جتایا کہ سنگاپور کے ان کے اس دورہ سے آسیان اور مشرقی ایشیا کے ممالک کے ساتھ بھارت کی بڑھتی ہوئی شرکت کو نئی رفتار ملے گی۔