مودی ہی ہیں جو ملک مخالف کام کررہے ہیں: راہل گاندھی
کنور،17؍اپریل (ایس او نیوز؍یو این آئی) کانگریس صدر راہل گاندھی نے وزیر اعظم نریندر مودی کے کانگریس کو ملک مخالفین کا حامی قرار دینے سے متعلق الزام پر بدھ کے روز جوابی حملہ کرتے ہوئے کہا کہ یہ مودی ہی ہیں جو ملک مخالف کام کر کے ملک کو تقسیم کر رہے ہیں۔ راہل گاندھی نے کہا کہ اس بار لوک سبھا انتخابات میں تین بڑے مسائل ہیں، تباہ معیشت اور بے روزگاری، کسانوں کی خود کشی اور وزیر اعظم نریندر مودی کی بدعنوانی۔
راہل گاندھی نے شمالی مالابار کے مشترکہ جمہوری مورچہ (یو ڈی ایف) کے رہنماؤں کے ساتھ یہاں منعقد ہ جلسے موقع پر صحافیوں سے بات چیت میں دعوی کیا کہ کانگریس اور اس کے اتحادی اس الیکشن میں بہتر کارکردگی کا مظاہرہ کریں گے اور مرکز میں اگلی حکومت قایم کریں گے۔ انہوں نے مودی کے کانگریس پر ملک مخالفین کا حامی هونے کے الزام پر سخت رد عمل کا اظہار کرتے ہوئے کہا کہ "یہ وزیر اعظم (مودی) ہی ہیں جو قوم کو تقسیم کرنے والے کام کر کے ملک مخالف کام کر رہے ہیں۔
انہوں نے کہا کہ مودی کو بہانے بازی بند کرنی چاہئے اور بے روزگاری، زراعت کے ٹھپ ہونے اور بھارتیہ جنتا پارٹی کی زیر قیادت قومی جمہوری اتحاد حکومت کے کرپشن پر اپوزیشن کے اٹھائے گئے سوالات کا جواب دینا چاہئے۔ انہوں نے کہا کہ " ملک پر حملہ کرنے والی قوتوں کے خلاف لڑنے میں ہمارا بے مثال ریکارڈ ہے۔ ہزاروں کانگریس کارکنوں نے پنجاب اور شمال مشرقی ریاستوں میں ماؤنواز باغیوں اور دہشت گردوں جیسے باغیوں کے حملوں میں اپنی جان گنوائی ہيں"۔
اس اجلاس میں کانگریس لیڈر مکل واسنک، کے سی وینو گوپال، امن چنڈی، ریاستی کانگریس صدر ملاپلي رام چندرن، یوڈی ایف امیدوار کے سدھاكرن اور راج موہن انیتھن اور دیگر سینئر لیڈران موجود تھے۔
