نیپال کو ہرسال 20لاکھ ٹن ایندھن کی فراہمی مودی نے جنوبی ایشیا کی پہلی عالمی پائپ لائن کا افتتاح کیا
نئی دہلی،11؍ستمبر(ایس او نیوز؍یو این آئی) وزیر اعظم نریندر مودی اور نیپال کے وزیرا عظم کے پی شرما اولی نے منگل کو ویڈیو کانفرنسنگ کے ذریعے موتیہاری-املیکھ گنج پائپ لائن منصوبے کا افتتاح کیا جو جنوبی ایشیا کی پہلی عالمی پائپ لائن ہے - مودی نے اس موقع پر کہا کہ اس پائپ لائن کے ذریعے ہر سال نیپال کو 20لاکھ ٹن ایندھن کی سپلائی کی جا سکے گی- اس پائپ لائن سے نیپال کے عوام کو مدد ملے گی- انہوں نے اس بات پر اطمینان ظاہر کیا کہ اس منصوبے کی وجہ سے نیپال میں ایندھن کی قیمت کم ہوگی- مسٹر اولی نے اپنے ملک میں پٹرول اور ڈیزل کی قیمتوں میں فوری طور پر تخفیف کا اعلان کرتے ہوئے کہاکہ مجھے آپ کو یہ بتاتے ہوئے خوشی ہورہی ہے کہ نیپال آئل کارپوریشن نے آج سے پٹرول اور ڈیزل کی قیمتوں میں دو-دوروپئے کی تخفیف کر دی ہے - انہوں نے کہا کہ اس منصوبے سے دونوں ملکوں کے باہم تعلقات کو نئی جہت ملے گی-انہوں نے مودی کو جلد از جلد نیپال کا دورہ کرنے کی دعوت دیتے ہوئے کہا کہ بلاشبہ یہ منصوبہ دونوں ملکوں کے درمیان باہم تعلقات اور انحصار کو فروغ دے گا- یہ تجارت کے شعبے میں تعلقات کی بہترین مثالوں میں سے ایک ہے - انہوں نے کہا کہ خوشحال نیپال بنانے کے لئے وہ وزیر اعظم ہند کے ساتھ مل کر کام کرنے کے متمنی ہیں -مودی نے اولی کی دعوت پرخوشی ظاہر کرتے ہوئے کہا کہ وہ جلد از جلد نیپال کا دورہ کرنا چاہیں گے - دونوں ملکوں کے عوام کے درمیان دہائیوں پرانا رشتہ ہے - فی الحال اعلیٰ سطحی سیاسی تعلقات بھی بڑھے ہیں - انہوں نے کہا کہ وہ گذشتہ ڈیڑھ سال میں چار مرتبہ نیپال کا دورہ کرچکے ہیں - دونوں ملکوں کے مشترکہ منصوبوں کو جلد از جلد نافذ کرنا دونوں حکومتوں کی ترجیحات میں شامل ہے - وزیراعظم نے کہا کہ ہندوستان-نیپال کے تعلقات کو نئی بلندی تک لے جانے کے لئے ایک بڑا ایجنڈہ تیار کیا گیا ہے - انہوں نے کہاکہ میں نیپال کی ترقی اور خوشحالی حاصل کرنے کی سمت میں ہندوستان کے پابند عہد ہونے کو دہراتا ہوں -اولی نے کہا کہ یہ منصوبہ اپنے آپ میں انوکھا ہے - متعینہ وقت سے پہلے مکمل کئے گئے اس منصوبے سے وقت اور پیسے کی لاگت میں کمی آئے گی، اس سے سڑک پر نقل و حمل (ٹرانسپورٹ)کا بوجھ کم ہوگا اورپٹرولیم ہندوستان سے نیپال لے جانے کے دوران ہونے والی فضائی آلودگی کو کم کرنے میں مدد ملے گی-