مودی سرکار کا اعلان؛ وبائی دور میں غر بیوں کیلئے دو ماہ میں ’پانچ کیلو‘ ملے گا مفت راشن
نئی دہلی، 24؍ اپریل(ایس او نیوز؍ایجنسی)کورونا وائرس کی دوسری لہر کی وجہ سے روزانہ بڑی تعداد میں کیسز سامنے آرہے ہیں۔ پچھلے دو دن سے ملک میں اتنے زیادہ کیسز سامنے آئے جو آج تک کسی بھی ملک میں سامنے نہیں آئے ہیں۔ اس انفیکشن کی لہر کو روکنے کے لئے حکومتیں کام کر رہی ہیں۔ وبا کے اس دور میں غریبوں کو کھانے پینے کی چیزوں کی پریشانی سے بچانابھی لازمی ہے، مرکزی حکومت نے اس کے لئے اہم اقدامات کئے ہیں۔
اطلاع کے مطابق سال گزشتہ والی اسکیم کے تحت ایک بار پھر مرکزی سرکار نے غریبوں کو مفت میں راشن فراہم کرنے کا اعلان کیا ہے۔پردھان منتری منصوبہ کے تحت مرکزی حکومت مئی اور جون 2021 کے مہینوں میں غریبوں کو مفت راشن فراہم کرے گی۔ واضح ہو کہ اس اسکیم کے تحت دو ماہ میں ’پانچ کیلو‘راشن دیئے جائیں گے۔اس سے تقریبا 80 کروڑ افرادکو مفت راشن حاصل کرنے میں آسانی ہوگی۔ گذشتہ سال حکومت نے کورونا دور میں غریبوں کو مفت میں راشن فراہم کیا تھا۔
مرکزی حکومت کی طرف سے جاری بیان کے مطابق حکومت ہند نے 80 کروڑ فائدہ اٹھانے والے افراد کو مفت میں راشن مہیا کرنے کا فیصلہ کیا ہے۔حکومت نے کہا کہ وزیر اعظم نریندر مودی نے اس بات پر زور دیا ہے کہ ایسے وقت میں جب ملک میں کورونا وائرس کی دوسری لہر کا سامنا ہے، اس کے لئے یہ ضروری ہے کہ غریبوں کا بھی خیال رکھا جائے، ان کے لئے دو ماہ میں پانچ کیلو راشن مفت میں دیئے جائیں۔مرکزی حکومت کے اس اسکیم کے تحت تقریبا 26 ہزار کروڑ روپئے خرچ ہوں گے۔