ملک کی معاشی ابتری کے لئے کورونا نہیں ، مودی اہم وجہ سبب : مینگلور میں سابق وزیر رماناتھ رائی کا مودی پر راست حملہ
منگلورو:7؍جون (ایس اؤ نیوز) ملک کی معاشی ابترحالت کے لئے وزیر اعظم نریندر مودی کی قیادت والی بی جے پی سرکار کی غلط پالیساں ہی اہم وجہ سبب ہیں نہ کہ کورونا وائرس ۔ان خیالات کا اظہار سابق وزیر بی رما ناتھ رائی نے کیا۔
پریس کانفرنس میں بات کرتے ہوئے رماناتھ رائی نے کہاکہ لاک ڈاؤن سے پہلے ہی ملک کی معاشی حالت خستہ تھی، مگر اچانک لاک ڈاون سے مزید خستہ ہوگئی۔ انہوں نے کہا کہ کووڈ-19سے زیادہ اموات کا درد جھیلنے والے امریکہ میں ڈالر کی قیمت کم نہیں ہوئی ، وہاں کے ممالک عوام کو راست طورپر معاشی امداد بہم پہنچانے میں لگے ہوئے ہیں۔ انہوں نے کہاکہ کووڈ-19کا پتہ گذشتہ سال 2019میں ہی چل گیا تھا، لیکن بی جے پی نے اپنے اقتدار کی ہوس کے لئے اور مدھیہ پردیش حکومت کو گرانے کے لئے لاک ڈاؤن کو ملتوی کیا ،رماناتھ رائی نے مودی پر کڑی تنقید کرتے ہوئے کہا کہ مودی نے اپنے اقتدارکی ہوس کے لئے ملک کے عوام کو مشکلات میں پھنسا دیا ہے۔
پٹرول اور ڈیزل کی قیمتوں میں اضافہ اور دیگر غلط پالیسیوں پر بھی سوال اٹھاتے ہوئے رائی نے کہاکہ بین الاقوامی بازار میں خام تیل کی قیمتوں میں کمی ہونے کے باوجود بھارت میں پٹرول اور ڈیزل کی قیمتوں میں کمی نہیں کی جارہی ہے ۔ لاک ڈاؤن سے پہلے ہی ریزرو بینک میں موجود محفوظ ضمانت کو واپس لیا گیا تھا، انشورنس کمپنیوں کو نیلام کیاگیا، جیو ٹیلی کام کے لئے بی ایس این ایل کا خسارہ کیاگیا۔ نریگا کے معاوضہ میں کمی کی گئی ، کالا دھن واپس نہیں لایا گیا ، البتہ ا س کے بدلے میں نوٹ بندی کے ذریعے غریبوں کا پیسہ بینک میں جمع کرایا گیا۔ انہوں نے مودی پر جم کر تنقید کرتے ہوئے کہا کہ مودی کے اقتدار میں ملک کے سرمایہ دار اور صنعت کار پیسہ لوٹ کر فرار ہوگئے اور آخر کار کانگریس حکومتوں کی طرف سے جاری کئے گئے انیا بھاگیہ اور نریگا منصوبہ جات نے ہی عوام کو سہارا دیا۔
رائی نے کہا کہ دکشن کنڑا ضلع کے تین بینک اپنی بنیاد کھو چکے ہیں، نیشنل ہائی وے اتھارٹی نے بھی اہم کام مکمل نہیں کئے۔ سیلاب متاثرین کو معاوضہ نہیں دینے پر بھی رائی نے سخت تنقید کی۔
پمپ ویل سرکل کو ساورکر کےنام کا بیانر لگائے جانے پر رما ناتھ رائی نے کہاکہ مختلف مقامات کو اہم شخصیات سے موسوم کیاجاچکاہے اب ان کانام بدلنے کی ضرورت نہیں ہے، ساورکر بیانر کو سرکل پر لگانا شرپسندوں کی کرتوت ہے ، جن کے پیچھے بی جےپی اور ان کی تنظیموں کے لیڈران کی شہہ بھی شامل ہے۔ رائی نے کہا کہ بی جےپی کی حکومت ہرمحاذ پر ناکام ہوچکی ہے، عوام کا غصہ ابل پڑ رہاہے اس کو دوسرا رخ دینے کے لئے بی جے پی کی جانب سے اس طرح کی شرارتیں کی جارہی ہیں تاکہ عوام کا ذہن اصل موضوع سے ہٹ جائے۔
اس موقع پر کانگریس لیڈران ششی دھر ہیگڈے ، اشوک ڈی کے ، ابراہیم کوڑیجال ، شالیٹ پنٹو، سبھود ، شاہ الحمید وغیرہ موجود تھے۔
