بھٹکل 8/اکتوبر (ایس او نیوز) اُترکنڑا، دھارواڑ، گدگ اور ہاویری اضلاع کی حدود پر مشتمل کرناٹک مغربی گریجویٹ حلقہ کے 28 اکتوبر  کو ہونے والے انتخابات کے لئے پورے علاقوں میں  5 نومبر تک کے لئے انتخابی ضابطہ اخلاق لاگو کیا گیا ہے جس کے دوران  کسی بھی طرح کے پروگرام،  اجلاس وغیرہ منعقد کئے جانے  کی اجازت نہیں ہوگی۔ یہ بات بھٹکل کے تحصیلدار ایس روی چندرا نے دی۔

ویسے تو بھٹکل میں گریجویٹس کی تعداد کافی زیادہ ہے اور ہر گھر میں کم از کم دو سے تین لوگ گریجویٹس  ہوتے  ہی ہیں، مگراخبار نویسوں سے گفتگو کرتےہوئے تحصیلدار  نے بتایا کہ  بھٹکل میں  اس انتخابات کےلئے گریجویٹس ووٹروں کی تعداد صرف 997  ہے۔

یاد رہے کہ اس الیکشن کے ذریعے  لیجیسلیٹو کونسل  کے لئے اراکین کا انتخاب ہوتا ہے، کل 7/اکتوبر تک مغربی حلقہ کے لئے چھ لوگوں نے اپنا پرچہ نامزدگی داخل کیا تھا، آج 8/اکتوبر کو پرچہ نامزدگی داخل کرنے کی آخری تاریخ ہے۔ 9/اکتوبر کو نامزدگی پرچوں کی جانچ ہوگی جبکہ پرچہ واپس لینے کی آخری تاریخ 12 اکتوبر ہے۔ اس الیکشن  میں حصہ لینے کے لئے دھارواڑ ڈپٹی کمشنر دفتر میں پرچہ نامزدگی  داخل کرنا ہوتا ہے۔

ایم ایل سی انتخابات کے تعلق سے اُترکنڑا ڈپٹی کمشنر کی ہدایت:

گریجویٹس حلقہ کے انتخابات کے تعلق سے ڈاکٹر ہریش کمار ،جو   اُترکنڑا کے ڈپٹی کمشنر کے ساتھ ساتھ  ضلع کے اسسٹنٹ الیکشن آفسر بھی ہیں نے کاروار سے   اخباری بیان  جاری  کرتےہوئے بتایا ہے کہ کوویڈ 19  وباء پھیلنے کے تناظر میں ، مرکزی الیکشن کمیشن  کی ہدایت کے مطابق کرناٹک مغربی گریجویٹیس حلقہ کے انتخابی مہم کے لئے ہر تعلقہ  میں پبلک گراؤنڈ اور ہیلتھ ریگولیٹرز مقرر کیے ہیں۔

 امیدواروں اور سیاسی جماعتوں کو انتخابی مہم چلانے کے لئے اُمیدواروں کو اپنے اپنے  تعلقہ  کے تحصیلداروں سے اجازت نامہ  حاصل کرنا ہوگا۔ انتخابی مہم کے دوران ہر ایک کو ماسک پہننا لازمی ہوگا ، سینیٹائزر کے استعمال اور سماجی فاصلہ   کو بھی  برقرار رکھنا ہوگا۔ اور اس کام کےلئے   درکار تھرمل اسکینر اور ایکسلرومیٹر سسٹم وغیرہ کا انتظام پروگرام کے آرگنائزر کو ہی  کرنا ہوگا۔  ڈپٹی کمشنر نے متنبہ کرایا ہے کہ  ان دفعات کی خلاف ورزی کرنے والوں کے خلاف ڈیزاسٹر مینجمنٹ ایکٹ اور آئی پی سی کی دفعہ 188 کے تحت قانونی کارروائی کی جائے گی۔