بندوق لہراکر ناچنے والے ممبر اسمبلی پرنب سنگھ کے تین ہتھیاروں کے لائسنس منسوخ
نئی دہلی، 13 جولائی(ایس او نیوز/آئی این ایس انڈیا) بھارتیہ جنتا پارٹی (بی جے پی) سے معطل کئے جانے کے بعد رکن اسمبلی کنور پرنب سنگھ ’چمپئن‘ کی مشکلیں کم ہوتی دکھائی نہیں دے رہی ہیں۔بندوقوں کو ہاتھ میں لے کر شراب پیتے ہوئے ناچنے کا ان کا ویڈیو وائرل ہونے کے بعد ان کے تین ہتھیاروں کا لائسنس منسوخ کر دیا گیا ہے۔یہ تینوں ہتھیار وائرل ویڈیو میں نظر آنے والے ہی ہیں۔ہردوار ضلع مجسٹریٹ دپندر چودھری نے معطل کارروائی کی تصدیق کی ہے۔بتایا گیا ہے کہ معطل ہوئے تینوں ہتھیار چمپئن کے نام پر تھے۔ڈی ایم ہردوار نے معطل کارروائی کرکے منگلور تھانے کو حکم کی کاپی بھیج دی ہے۔اب تھانے سطح پر ہتھیار ضبط کرکے آگے کی کارروائی ہوگی۔بتا دیں کہ ویڈیو کے دوران چمپئن تین پستول اور ایک رائفل ہاتھ میں لئے ناچتے نظر آئے تھے۔اس دوران کئی بار انہوں نے پستول کو ہوا میں لہرایا تھا۔درمیان میں وہ اسے منہ میں لے کر بھی ناچتے رہے اور شراب پیتے رہے،ان کے ساتھ کچھ اور لوگ بھی موجود تھے۔انہیں کے کسی ساتھی نے اس ویڈیو کو شوٹ کیا تھا لیکن بعد میں یہ سوشل میڈیا پر وائرل ہو گیا۔