مینگلور کے قریب کوناجے میں گھر کے باہر رکھی ہوئی دو کاروں پرپتھراو؛ گھر کی کھڑکیوں کو بھی نقصان
مینگلور 4 مارچ (ایس او نیوز) شہر کے مضافاتی علاقہ ا ور کوناجے پولس تھانہ حدود کے جلّی کراس میں واقع عباس نامی شخص کے مکان کے باہر پارک کی ہوئی دو کاروں پر پتھراو کرکے کاروں کے شیشے توڑنے سمیت گھر کی کھڑکیوں کے بھی شیشے توڑنے کی واردات بدھ اور جمعرات کی درمیانی شب کو پیش آئی ہے۔
ذرائع سے ملی اطلاع کے مطابق اُلال کے قریبی علاقہ جلّی کراس علاقہ میں ماروتی اومنی اور کوالیس کار گھر کے ورانڈا میں پارک کی گئی تھی، رات قریب 3:30 بجے اچانک پتھراو کی آوازیں سنائی دیں تو گھر والے باہر آگئے، دیکھا تو دونوں کاروں کے شیشوں سمیت گھر کی کھڑکیوں پر بھی پتھراو کرتے ہوئے شدید نقصان پہنچایا گیا ہے۔
عباس کے تعلق سے پتہ چلا ہے کہ وہ ایک راشن کی دکان چلاتا ہے، کسی سے اُس کی کوئی دشمنی بھی نہیں ہے۔ اس بناء پر لوگ اس طرح کی توڑپھوڑ کی واردات پر تعجب کا اظہار کررہے ہیں۔
واردات کی اطلاع ملتے ہی کوناجے پولس کے اہلکار جائے وقوع پر پہنچے، پولس مزید چھان بین کررہی ہے۔
