نئی دہلی،15؍ستمبر(ایس او نیوز؍یو این آئی) وزیر دفاع راج ناتھ سنگھ نے جموں و کشمیر میں انسانی حقوق کی خلاف ورزی کے سلسلے میں بے وجہ کا راگ الاپنے والے پاکستان کو کرارا جواب دیتے ہوئے آج کہا کہ وہ تقسیم کے بعد وہاں گئے لوگوں کا استحصال کر رہا ہے جبکہ ہندوستان میں اقلیتی طبقہ محفوظ تھا، ہے اور آگے بھی رہےگا۔ راج ناتھ سنگھ نے پاکستان کو نصیحت بھی کی ہے کہ اسے اپنے گریباں میں جھانکنا چاہیے اور اپنے یہاں ہونے والے انسانی حقوق کی شدید خلاف ورزی کا بھی نوٹس لینا چاہیے۔

اتوار کی صبح سلسلے وار ٹوئٹ میں انہوں نے لکھا، ’’جس پاکستان میں سارے اقلیتی طبقے اپنے تحفظ کے لئے فکر مند رہتے ہیں، اس کے منہ سے انسانی حقوق کی باتیں اچھی نہیں لگتیں۔ دفعہ 370 ختم کرنے کے ہندوستان کے فیصلے کو وہ ہضم نہیں کر پا رہا ہے اور اس نے اقوام متحدہ کو بھی گمراہ کرنے کی کوشش کی ہے۔‘‘

انہوں نے مزید کہا، ’’ہندوستان میں سبھی مذہب کے لوگ پرامن طریقےسے ایک دوسرے سے مل جل کر رہ رہے ہیں، یہ بات پاکستان کو راس نہیں آتی۔ اقلیتی طبقہ بھی یہاں خود کو محفوظ محسوس کرتا ہے۔ اقلیتی طبقہ یہاں ہمیشہ محفوظ تھا، ہے اور آگے بھی رہےگا۔‘‘

وزیر دفاع نے کہا کہ پاکستان میں لمبے وقت سے انسانی حقوق کی خلاف ورزی کا سلسلہ جاری ہے۔ جو لوگ تقسیم کے بعد پاکستان گئے انہیں آج بھی وہاں پر مہاجر کہہ کر بے عزت کیا جاتا ہے۔ جبکہ ہندوستان میں سبھی لوگوں کا احترام ہوتا ہے اور وہ خود کو محفوظ محسوس کرتے ہیں۔ پاکستان میں سندھی، سکھ، بلوچی اور دیگر اقلیتی طبقوں کے ساتھ کیا ہو رہا ہے، یہ بات آج دنیا سے چھپی نہیں ہے۔ انہوں نے کہا کہ جو پاکستان اقوامی متحدہ میں انسانی حقوق کی بات اٹھا رہا ہے وہ خود اپنے ملک کے اندر جھانک کر دیکھے۔

انہوں نے سخت لہجے میں کہا کہ ’’ہمارے پڑوسی کو دہشت گردی کی اپنی پالیسی چھوڑ دینی چاہیے ورنہ تو ایک دن اسے مجبوراً چھوڑنی پڑے گی، کیونکہ اگر اس کی پالیسیاں نہیں بدلیں تو اس کے ٹکڑے ہونے سے دنیا کی کوئی طاقت نہیں روک سکتی۔ واضح رہے کہ پاکستان نے حال ہی میں اقوام متحدہ میں جموں و کشمیر میں مبینہ انسانی حقوق کی خلاف ورزی کا معاملہ اٹھایا تھا۔ ہندوستان نے اسے کورا جھوٹ قرار دیتے ہوئے پاکستان کو دہشت گردی کا گڑھ بتایا تھا۔