گھر چھوڑ کر فرار ہونے کی کوشش ہوئی ناکام، لڑکا اور لڑکی کو بھٹکل ریلوے اسٹیشن پر دھرلیا گیا، کیا گیا گھروالوں کے حوالے
بھٹکل 28/جون (ایس او نیوز) بھٹکل ریلوے اسٹیشن سے ایک نابالغ لڑکا اور لڑکی کی گھر چھوڑ کر فرار ہونے کی کوشش ناکام ہوگئی جب مقامی اہلکاروں نے شک کی بنیاد پر دونوں سے پوچھ گچھ کرتے ہوئے حققیقت سے آگاہی حاصل کرلی اور دونوں کے گھروالوں کو خبر کردی، بعد میں دونوں کے گھروالے بھٹکل ریلوے اسٹیشن پہنچ گئے اور اپنے بچوں کو اپنے ساتھ لئے گئے۔
بتایا گیا ہے کہ سنیچر شام کو مرڈیشور سے ایک 17 سالہ لڑکا اور ایک 15 سالہ لڑکی گھر سے فرار ہوکر بھٹکل ریلوے اسٹیشن پر منگلا ایکسپریس ٹرین کا انتظار کررہے تھے، بتایا گیا ہے کہ دونوں شام پانچ بجے سے ریلوے اسٹیشن پر ہی ٹرین کے انتظار میں تھے، ریلوے کے کچھ اہلکاروں نے جب اُن سے جاننے کی کوشش کی کہ وہ کون ہیں اور یہاں کیا کررہے ہیں تو انہوں نے بتایا کہ ہم بھائی بہن ہیں اور گوا جانے کے لئے ٹرین کا انتظار کررہے ہیں۔
چونکہ بھٹکل ریلوے اسٹیشن پر ٹرین سے اُترنے والوں کی سختی کے ساتھ جانچ کرنے تعلقہ انتظامیہ نے اپنے اہلکاروں کو مقرر کررکھا ہے، رات قریب بارہ بجے جب ان اہلکاروں نے دونوں سے جاکر سوالات کئے پھر اسکول کا نام پوچھتے ہوئے اسکول کے ہیڈ ماسٹر سے رابطہ کیا تو ہیڈ ماسٹر صاحب نے بتایا کہ یہ دونوں گھر سے لاپتہ ہیں اور گھر والے ان کو تلاش کررہے ہیں۔
واقعے کی اطلاع ملتے ہی پی ایس آئی بھرت اور دیگر اہلکار جائے وقوع پر پہنچ گئے اور گھروالوں کو خبر کرتے ہوئے اسٹیشن پر ہی دونوں کے والدین /سرپرستوں کو بلالیا، جس کے بعد دونوں کے والدین/سرپرست ریلوے اسٹیشن پہنچ کر اپنے بچوں کو اپنے ساتھ لئے گئے۔