ان لاک 3 کی گائیڈ لائنس جاری؛ یکم اگست سے رات کا کرفیو ختم؛ 5؍اگست سے کھلیں گے جم، تعلیمی ادارے ہنوز رہیں گے بند
نئی دہلی،29؍جولائی(ایس او نیوز؍ایجنسی) وزارت داخلہ (منسٹری آف ہیلتھ آفئیرس) نے بدھ کو ان لاک تھری کی گائیڈ لائنس جاری کرتے ہوئے یکم اگست سے رات کا کرفیو ختم کرنے کا اعلان کیا ہے۔ ان لاک تھری میں 5 اگست سے یوگا اور جم کو کھولنے کی اجازت دی گئی ہے لیکن وزارت صحت کی جانب سے دی گئی ہدایات پر عمل کرنا ضروری ہوگا۔
ان لاک تھری میں اس مرتبہ کنٹمنٹ زون کے باہر مزید سرگرمیاں شروع کرنے کیلئے قدم اٹھائے گئے ہیں ۔ حالانکہ وزارت داخلہ کے حکم کے مطابق سبھی کنٹیمنٹ زون میں 31 اگست تک سخت لاک ڈاون رہے گا۔
اسکول ، کالج اور سبھی تعلیمی ادارے 31 اگست تک بند رہیں گے ۔ آن لائن اور ڈیسٹینسنگ اسٹدی پہلے کی طرح ہی جاری رہے گی ۔ سنیما ہال ، سوئمنگ پول ،تفریحی پارک ، تھیٹر ، بار ، آڈیٹوریم ، اسمبلی ہال اور ایسی سبھی جگہیں جہاں کثیر تعداد میں لوگ جمع ہوتے ہیں، تمام ہنوز بند رہیں گے۔
میٹرو ریل خدمات پر بھی پابندی جاری رکھی گئی ہے۔البتہرہنما خطوط میں کہا گیا ہے کہ مختلف ریاستوں اور کسی بھی ریاست کے اندر لوگوں کی یا سامان کی نقل و حرکت کے لئے کسی بھی علیحدہ اجازت یا ای اجازت نامے کی ضرورت نہیں ہوگی۔ سماجی، سیاسی، کھیل، تفریحی، تعلیمی، ثقافتی، مذہبی پروگراموں اور بڑے پیمانے پر لوگوں کے اجتماع کی اجازت نہیں ہوگی۔ اس دوران آروگیہ سیتو ایپ کے استعمال کو فروغ دیا جائے گا۔
ان لاک۔ 3 کے لئے جاری کردہ رہنما خطوط میں، مرکزی حکومت نے یوم آزادی کی تقریب منانے کی اجازت دی ہے لیکن کہا ہے کہ سماجی فاصلہ برقرار رکھنا ہوگا اور صحت سے متعلق دیگر معیارات کو پورا کرنا ہوگا۔ اس کے علاوہ، وندے بھارت، بھارت مشن کے تحت بین الاقوامی سفر کی اجازت دی گئی ہے۔