منگلور سے عازمین کا دوسرا قافلہ مدینہ منورہ روانہ ؛ حج بھون کی تعمیر کے لئے 10؍کروڑ مختص۔ ضمیر احمد نے زمین کا معائنہ کیا
منگلورو،23؍جولائی(ایس او نیوز) منگلورو ایر پورٹ سے کل سنیچر شام عازمین حج کا پہلا قافلہ راست مدینہ منورہ روانہ ہوگیا تھا جو 144عازمین پر مشتمل تھا۔ اتنے ہی عازمین کا دوسرا قافلہ آج اتوار صبح روانہ ہوا۔آخری قافلہ کل بروز پیر23؍جولائی کو سہ پہر تین بجے روانہ ہوگا۔
اس مرتبہ منگلور ایرپورٹ سے5؍اضلاع جنوبی کینرا، اڈپی، چک منگلور،ہاسن اور کورگ کے432عازمین راست مدینہ منورہ روانہ ہورہے ہیں۔ اس ایمبارکیشن پوائنٹ سے روانہ ہونے والے عازمین کا مدینہ منورہ میں8دن کا قیام رہے گا۔ اس کے بعد وہ مکہ مکرمہ پہنچیں گے۔ فریضہ حج کی ادائیگی کے بعد وہ جدہ تا منگلور راست پرواز سے واپس آئیں گے۔ عازمین کی روانگی کے موقع پر منعقدہ اجلاس میں ریاستی وزیر برائے اقلیتی بہبود،اوقاف وحج بی زیڈ ضمیر احمد خان نے عازمین سے درخواست کی کہ وہ اس ملک بالخصوص ریاست کرناٹک کی خوشحالی اور ترقی کے لئے خصوصی دعا کریں اور عالم اسلام میں امن وامان کی بحالی کے لئے بھی ضرور دعا کریں کیونکہ اللہ تعالیٰ حج بیت اللہ میں عازمین کی دعاؤں کو رد نہیں کریں گے۔
اس تقریب میں ریاستی وزیر برائے ہاؤزنگ وشہری ترقیات یو ٹی قادر، ینوپویا یونیورسٹی کے عبداللہ کنی، محمد کنی محکمہ اقلیتی بہبود کے سکریٹری محمد محسن آئی اے ایس، ریاستی حج کمیٹی کے ای او سرفراز خان اور دیگر نے شرکت کی۔ منگلور میں حج بھون کی تعمیر کے لئے10؍کروڑ روپئے مختص ہیں۔ پچھلے دنوں منگلور کے ایر پورٹ سے قریب حج بھون کی تعمیر کے لئے ایک زمین کی نشاندہی کی گئی تھی یہ علاقہ آبادی سے کافی دور ہے۔ اس لئے ضمیر احمد خان، یو ٹی قادر اور متعلقہ افسروں نے حج بھون کی تعمیر کے لئے اڈیار علاقے میں ایک مسجد سے منسلک ایک ایکڑ زمین کی نشاندہی کرکے اس کا معائنہ بھی کیا۔ اس زمین سے متعلق ضمیر احمد خان نے اخبارنویسوں کو بتایا کہ حج بھون کی تعمیرکرنے کیلئے یہ جگہ نہایت موزوں ہے جو کثیر مسلم آبادی کے درمیان ہونے کے علاوہ ایک بڑی مسجد سے متصل ہے۔ اس زمین کو خرید کر حج بھون کی تعمیر سے حج سیزن کے علاوہ بھی مسلمان اس کا استعمال شادی خانہ کے طورپر کرسکیں گے۔ انہوں نے بتایا کہ اس زمین کو حاصل کرنے کے لئے وہ سرکاری سطح پر کارروائی شروع کریں گے۔