اُڈپی میں کورونا وائرس کے معاملات کو لے کر ریاستی وزیر اور محکمہ صحت کے اعداد و شمار میں نمایاں فرق؛ کہیں رپورٹ کو چھپایا تو نہیں جارہا ہے ؟
اُڈپی،4؍جون(ایس او نیوز) اُڈپی ضلع میں کورونا وائرس کے معاملات کی تعداد کو لے کر ریاستی وزیر برائے محصولات آر اشوک اور محکمہ صحت کی جانب سے جاری اطلاع میں فرق کی وجہ سے اُڈپی ضلع کے عوام تذبذب کا شکار ہوگئے ہیں۔
اطلاع کے مطابق اُڈپی ضلع میں منگل کے دن سرکاری ہیلتھ بلٹین میں 150 افراد کو کورونا وائرس لاحق ہونے کی تصدیق کی گئی تھی، لیکن ریاستی وزیر آراشوک نے اپنے بیان میں بتایا تھا کہ اُڈپی ضلع میں 210 افراد کا ٹیسٹ پوزیٹیوآیا ہے۔
ذرائع سے پتہ چلا ہے کہ اُڈپی کے بعض لوگ جو گلف سے آئے تھے، ان کی رپورٹ بھی کورونا پوزیٹو آنے کے بعد انہیں اُڈپی اسپتال کے کوویڈ بلاک میں لے جایا گیا ہے، مگر ہیلتھ بلٹین میں گلف سے رابطے والے مریض کا کوئی تذکرہ نہیں ہے۔ سننے میں آیا ہے کہ گلف سے لوٹنے والے ایک شخص کے رابطے والے پانچ گھروں کو سیلڈ ڈاون بھی کیا گیا ہے ۔
ان واقعات کے بعد اب عوام میں قیاس آرائیاں کی جارہی ہیں اور لوگ ایک دوسرے سے سوال کررہے ہیں کہ کیا کورونا وائرس کے معاملہ میں حکومت اعداد و شمار کو چھپا تو نہیں رہی ہے؟
