وشواناتھ کا سدرامیا کے متعلق بیان غیر ذمہ دارانہ: ایم ٹی بی ناگراج
بنگلورو،16/مئی(ایس او نیوز) ریاستی وزیر ہاؤزنگ ایم ٹی بی ناگراج نے ریاستی جے ڈی ایس صدر ایچ وشواناتھ کی طرف سے سابق وزیراعلیٰ سدرامیا اور ان کے حامیوں کے خلاف دئے گئے بیان کی مذمت کی ہے۔ اخباری نمائندوں سے بات چیت کرتے ہوئے انہوں نے کہاکہ وشواناتھ اس سے پہلے بھی اپنی بدزبانی کی وجہ سے کئی سیاسی مواقع گنوا چکے ہیں، جہاں تک سدرامیا کے دوبارہ وزیراعلیٰ بننے کا سوال ہے بعض اراکین اسمبلی نے ان کی محبت میں اپنی رائے ظاہر کی ہے۔ ان کے رائے ظاہر کرتے ہی موجودہ مخلوط حکومت میں وزیراعلیٰ کمار سوامی کو ہٹاکر سدرامیا کو وزیراعلیٰ نہیں بنادیا جائے گا، وشواناتھ کو اس کا احساس ہونا چاہئے۔مخلوط حکومت میں شامل جے ڈی ایس کے صوبائی صدر ہوتے ہوئے انہوں نے جو بیان دیا ہے وہ غیر ذمہ دارانہ ہے۔