بھٹکل،29؍اپریل (ایس او نیوز) کورونا وباء کے پس منظر میں لاک ڈاؤن کیے جانے کے بعد جو مہاجر مزدور ضلع شمالی کینرا میں پھنس گئے تھے ان کو اپنے اپنے گاؤں بھیجنے کا بندوبست ضلع انتظامیہ کی طرف سے کیا گیا۔
منگل کے دن سیکڑوں مزدوروں کوکے ایس آر ٹی سی بسوں کے ذریعے ان کے گھروں کے لئے روانہ کیا گیا۔خیال رہے کہ قلی مزدوری کرنے والے سیکڑوں افراد ریاست کے مختلف گاؤں اور دیہاتوں سے ضلع شمالی کینرا کی طرف ہجرت کرکے آجاتے ہیں۔ان کے رہنے سہنے کا کوئی معقول ٹھکانہ نہیں رہنے سے لاک ڈاؤن کے دوران ضلع کے مختلف شہروں میں یہ لوگ بڑے مشکل حالات کا شکار ہوگئے تھے۔ریاستی حکومت کی ہدایت کے مطابق ضلع شمالی کینرا کی انتظامیہ نے کارروائی کی اور جملہ 242قلی مزدوروں کوبیدر رائچور،سوروپور، سندگی اورکوشٹگی وغیرہ میں واقع ان کے اپنے گھروں کوروانہ کردیا۔اس کے لئے مرڈیشور، کاروار اور جوئیڈا سے کُل 12سرکاری بسیں چلائی گئیں۔ایک بس میں صرف 20مسافروں کو سوار کروایا گیا۔ساتھ میں انہیں ماسک، پانی کے بوتل اور بسکٹ بھی دئے گئے۔