نئی دہلی،28؍مارچ (ایس او نیوز؍ایجنسی) کانگریس کے سینئر رہنما اجے ماکن نے کہا کہ ہزاروں کی تعداد میں پریشان حال غریب، مزدور، خواتین اور بچوں کا لاک ڈاؤں کے دوران شہروں سے اپنے گھروں کو لوٹنے کے لئے سینکڑوں کلو میٹر کا سفر پیدل طے کرنا آج کے دور کا ایک عظیم انسانی سانحہ ہے۔ اجے ماکن نے کہا کہ حکومت کی ناکامی، پولیس کی بریریت اور انتظامیہ کی بے حسی کے درمیان اتنی بڑی تعداد میں لوگوں کا پیدل نقل مکانی کرنا غالباً کورونا سے بھی زیادہ المناک ہے۔

واضح رہے کہ کانگریس صدر سونیا گاندھی، سابق صدر راہل گاندھی اور پارٹی کی اترپردیش کی انچارج اور جنرل سکریٹری پرینکا گاندھی نے بھی 21 دن کے لاک ڈاؤن کے دوران کھانے پینے کا انتظام نہ ہونے کی وجہ سے پیدل اپنے اپنے گھر وں کوجانے پرمجبور لوگوں کے حالت زار پر گہری تشویش کا اظہار کرتے ہوئے حکومت سے انہیں ٹرانسپورٹ مہیا کرا کر کر مطلوبہ مقام تک پہنچانے یا پھر لاک ڈاؤن کی مدت تک انہیں ضروری سہولیات فراہم کرنے کی اپیل کی ہے۔

میڈیا کو جاری کئے اپنے بیان میں اجے ماکن نے کہا، ’’سب سے بڑا سوال یہ ہے کہ اتنی بڑی تعداد میں مزدور آخر شہروں سے گاؤں کی طرف پیدل سفر کرنے پر مجبور کیوں ہو رہے ہیں؟ دراصل ان کا ذریعہ معاش ختم ہو چکا ہے کیوں کہ مالکان نے انہیں نوکری سے نکال دیا ہے۔ دوسرا رہنے کے لئے انہیں جو جگہ دی گئی تھی وہ بھی ان سے چھین لی گئی ہے یا پھر مالک مکان ان سے کرایہ مانگ رہا ہے اور تیسرا ان کے پاس اب کھانے کے لئے بھی کچھ نہیں ہے کیوں کہ ان کے پیسے ختم ہو چکے ہیں۔ چوتھا سب سے اہم وجہ یہ ہے کہ ان کا بھروسہ حکومتوں سے بھروسہ اور امید ختم ہو چکی ہے۔‘‘

اجے ماکن نے لاک ڈاؤن کو حکومت کی طرف سے بغیر غور و فکر کئے کی گئی ’تالا بندی‘ قرار دیتے ہوئے کہا کہ حکومت نے 4 گھنٹے کے نوٹس پر فرمان جاری کر دیا جس کی وجہ سے یہ افرا تفری پھیلی ہے۔ انہوں نے کہا کہ کانگریس رہنما راہل گاندھی نے کانگریس کارکنان سے اپیل کی ہے کہ ان کی ہر ممکن مدد کی جائے، نیز کانگریس صدر سونیا گاندھی نے بھی ان غریب مزدوروں کی مدد کے لئے وزیر اعظم کو خط ارسال کیا ہے۔ انہوں نے سوال اٹھایا کہ جب بیرون ملک سے ہندوستانیوں کی وطن واپسی کے لئے جہاز بھیجے جا سکتے ہیں تو پھر ان غریب لوگوں کے لئے حکومت انتظام کیوں نہیں کر سکتی؟

انہوں نے حکومت سے تین مطالبات کئے:

1۔ سب سے پہلے تو حکومت فوری طور پر ان مہاجر مزدوروں کے کھاتے میں ماہانہ 7500 روپے جمع کروائے، اسی سے زیادہ تر مزدور نقل مکانی کرنا شاید بند کریں گے۔

2۔ ریاستی حکومتوں کو ان غریبوں کے لئے مناسب مقدار میں راشن ، ادویات اور کھانا مہیا کرنا چاہئے۔

3۔ تمام غریب مہاجروں کو جو سڑکوں پر قیام کرنے پر مجبور ہیں یا دوسری ریاستوں میں اپنے گھروں سے دور درماندہ ہو گئے ہیں انہیں سوشل ڈسٹنسنگ کا خیال رکھتے ہوئے واپس لانے کا انتظام کیا جانا چاہئے۔

قبل ازیں، سونیا گاندھی نے اس سلسلہ میں وزیر اعظم نریندر مودی کو خط لکھ کر اپنے چھوٹے چھوٹے بچوں کے ساتھ پیدل سینکڑوں کلومیٹر دور واقع اپنے گھروں کو جا رہے لوگوں کے مسئلے پر ان کی توجہ دلائی اور کہا کہ حکومت کو ان لوگوں کو ان کے گھروں تک پہنچانے کا بندوبست کرنا چاہیے۔

راہل گاندھی نے ہفتہ کو لوگوں سے ان مزدوروں کی مدد کرنے کی اپیل کرتے ہوئے ٹوئٹ کیا”آج ہمارے سینکڑوں بھائی بہنوں کو بھوکے پیاسے اپنے کنبوں سمیت اپنے گاؤں کی جانب پیدل جانا پڑ رہا ہے۔ اس مشکل راستہ پر آپ میں سے جو بھی انہیں کھانا پانی اور پناہ دے سکے، مہربانی کر کے یہ کریں ۔ کانگرس کارکنوں اوررہنماؤں سے مدد کی خاص اپیل کرتا ہوں، جے ہند“۔

پرینکا گاندھی نے کہا ”یوپی-بہار کی طرف پیدل ہی اپنے گھروں کو روانہ ہو رہے مزدوروں کی حالت دیکھی نہیں جاتی۔ بیرون ملک میں پھنسنے پر لوگوں کو گھر لایا جاتا ہے۔ ان مزدوروں کو بھی گھر جانے کی خواہش ہے۔ یوپی کانگریس’موٹروے ٹاسک فورس‘ بنا کر ان کی مدد کر رہی ہے، مگر حکومت کے تعاون کے بغیر ان کی مدد ممکن نہیں ہے“۔

وہیں، کانگریس کے ترجمان رندیپ سنگھ سرجے والا نے کہا”ہزاروں غریب خاندان سمیت یوپی ، بہار پیدل جانے پر مجبورہیں اور وہ کہہ رہے ہیں کورونا وائرس سے نہیں تو بھوک سے مر جائیں گے۔ کیا اتنے بڑے انسانی المیہ کا کوئی جواب نہیں۔ کیا بسیں نہیں دے سکتے جو انہیں گھر چھوڑ سکے“۔