بنگلورو یکم جنوری (ایس او نیوز) ریاستی وزیر برائے آبی وسائل گووند کارجول نے بتایا کہ دیہی علاقوں میں پینے کے پانی کی فراہمی کے لئے نل اور میٹر کی تنصیب سے پانی کو ضائع ہونے سے بچانے کے علاوہ پنچایتوں کے منافع میں بھی اضافہ ہوگا- ودھان سودھا میں وزیراعلیٰ بسواراج بومئی کی قیادت میں منعقد ضلع پنچایت کا ای اوز کے اجلاس کے دوران جل جیون مشن اسکیم کا جائزہ لیتے ہوئے کارجول نے اس خیال کا اظہارکیا -

انہوں نے کہاکہ دیہی علاقوں میں پینے کے پانی کی فراہمی کے لئے ہر گھر میں نل اور میٹر نصب کیا جائے جس سے نافع بھی ہوگا- انہوں نے میٹر اور نل کی تنصیب سے ہونے والی سہولتوں کے تعلق سے مدھول تعلقہ کے الگلی گاڑی کی مثال دیتے ہوئے بتایا کہ گزشتہ 7تا8 سال قبل اس گاؤں میں روزانہ 15لاکھ لیٹر پانی کا استعمال ہوتا تھا- انہوں نے بتایا کہ اس گاؤں میں اب نل اور میٹرکی تنصیب کے بعد روزانہ صرف 5لاکھ لیٹر پانی استعمال ہورہا ہے اور پنچایت کو 10لاکھ روپئے منافع حاصل ہورہا ہے -

اس موقع پر باگل کوٹ ضلع میں جل جیون مشن کی کارکردگی کے بارے میں وہاں کے سی ای او بھوبالن نے جانکاری دی اوربتایا کہ ضلع میں 108 فیصد کامیابی حاصل کی گئی ہے -وزیراعلیٰ نے باگل کوٹ ضلع میں جل جیون مشن کی کارکردگی کو سراہا-