کاروار،21؍جنوری (ایس او نیوز)سابق وزیر دفاع شرد پوار سمیت کئی اراکین پر مشتمل پارلیمانی اسٹانڈنگ کمیٹی برائے دفاع کے ایک وفد نے کاروار میں واقع کدمبا بحری اڈہ کا دورہ کیا اور وہاں پر چل رہی سرگرمیوں کا جائزہ لیا۔

طیارے کے ذریعہ گوا پہنچنے کے بعد وہاں سے سڑک کے راستے آئی این ایس کدمبا بحری اڈے پر پہنچ کر وہاں بحریہ کے افسران سے ساحلی علاقے کے تحفظ اور بحیرہ عرب میں موجودہ سرگرمیوں کے موضوع پر بات چیت کی، اورگوا و کاروار کے بحری اڈوں کو درپیش حالات کے بارے میں جانکاری حاصل کی۔

ریئر ایڈمرل مہیش سنگھ نے کمیٹی کے تمام اراکین کا استقبال کیا۔ انہوں نے نیول شپ ریپیرنگ یارڈ کی جدید کاری، نیول شپ وکرم آدتیہ کی کارکردگی اور فی الحال سی برڈ منصوبے کے تحت چل رہے دوسرے مرحلے کی تمیر و توسیع کی صورتحال سے کمیٹی کو واقفیت دی۔

پارلیمانی اسٹانڈنگ کمیٹی برائے دفاع میں کانگریسی لیڈر راہل گاندھی سمیت جملہ 31اراکین شامل ہیں، لیکن بدھ کے دن اس کمیٹی کا جو وفد کاروار پہنچا تھا اس میں نصف سے زائد اراکین غیر حاضر تھے۔ پارلیمانی کمیٹی کی آمد کے پیش نظر گوا سے کاروار تک حفاطتی بندوبست سخت کردیا گیا تھا۔