میسورو،10؍جنوری (ایس او نیوز؍پیر پاشاہ) چامراج پورم میں واقع بھارتیہ جنتا پارٹی دفتر میں،حلقہ چامراجہ کے رکن اسمبلی ایل ناگیندرا نے کانگریس پارٹی پرالزام لگایا کہ کورونا وائرس کے تیزی سے پھیلنے کے درمیان کانگریس پارٹی کی جانب سے نکالی گئی میکے داٹو پدیاترا صرف سیاسی فائدہ حاصل کرنے کی کانگریس کی کوشش ہے۔ سال 2023میں منعقد ہونے والے ریاستی اسمبلی انتخابات کو دھیان میں رکھ کر پدیاترا کا اہتمام کیا گیا ہے۔
اس موقع پر رکن اسمبلی ایل ناگیندرا نے کانگریس کی قیادت والی پنجاب حکومت پر الزام لگاتے ہوئے کہا کہ پنجاب کی کانگریس حکومت نے ہمارے اس ملک کے وزیر اعظم کو سکیورٹی فراہم کرنے میں پوری طرح ناکام ہوگئی ہے۔ اس لئے وز یر اعظم کو سکیورٹی فراہم کرنے پر ناکام ہونے والی پنجاب کی کانگریس حکومت کو فوراًبرخواست کردینا چاہئے۔
کانگریس پارٹی کی جانب سے نکالی گئی پد یاترا کے تعلق سے سوال کرتے ہوئے رکن اسمبلی نے بتایا ہے کہ جب کے پی سی سی کے صدر ڈی کے شیوکمار جنتا دل (یس) اور کانگریس کی مخلوط حکومت میں ریاستی وزیر برائے آبی وسائل تھے تو میکے داٹو پراجیکٹ کے تعلق سے کوئی ٹھوس کام نہیں کیا اور کانگریس کے سینئر قائد و سابق ریاستی وزیر اعلیٰ سدرامیا پانچ سال اس ریاست کے وزیر اعلیٰ رہے تو انہوں نے میکے داٹو پراجیکٹ کے تعلق سے مطالبہ نہیں کیا۔