سری نگر: 21 /اپریل(ایس اونیوز /آئی این ایس انڈیا)بی جے پی کے ساتھ سرکاربناکربی جے پی کومضبوط کرنے والی پی ڈی پی صدر محبوبہ مفتی نے گورنر انتظامیہ پر جنگجوؤںں کے اہل خانہ کی ہراسانی کا الزام عائد کرتے ہوئے اس مبینہ سلسلے کو فوراً بند کرنے کا مطالبہ کیا ہے۔انہوں نے کہا کہ ایسی پالیسیاں کشمیریوں کو مزید الگ تھلگ کرنے کا سبب بنیں گی۔محترمہ مفتی نے اتوارکی شام اپنے ایک ٹویٹ میں لکھا’’انتظامیہ کوجنگجوؤں کے لاچار اہل خانہ کو ہراساں کرنا بند کرنا ہوگا‘‘۔ نور آباد (کولگام) کے مدثر اور اعجاز احمد کو گرفتار اور ان کے گھر میں توڑ پھوڑ کی گئی ہے۔ گرفتاری اور گھر میں توڑ پھوڑ کی وجہ یہ ہے کہ ان کا بھائی ایک جنگجو تھا۔ ایسی پالیسیاں کشمیریوں کو مزید الگ تھلگ کرنے کا سبب بنیں گی۔ریاست کی سابق وزیر اعلیٰ کا یہ بیان حساس ترین اننت ناگ پارلیمانی حلقے میں انتخابات سے محض ایک روز پہلے سامنے آیا ہے۔ چار اضلاع اننت ناگ، پلوامہ، شوپیاں اور کولگام پر مشتمل اننت ناگ پارلیمانی حلقے میں23 اپریل، 29 اپریل اور 6 مئی کو تین مرحلوں میں پولنگ ہونی ہے جس میں تقریباََ14 لاکھ رائے دہندگان محبوبہ مفتی سمیت18 امیدواروں کے سیاسی قسمت کا فیصلہ کریں گے۔