بھٹکل تلاند علاقے میں پینے کے پانی اور نیشنل ہائی وے کے مسائل پر مقامی باشندوں کی میٹنگ
بھٹکل5/دسمبر (ایس ا و نیوز) یہاں کے تلاند علاقے میں مقامی باشندوں نے سرکاری ماڈل اسکول میں ایک میٹنگ منعقد کی جس میں پینے کے پانی کے بنیادی وسائل کے تحفظ اور نیشنل ہائی وے توسیعی منصوبے سے پیدا ہونے والے مسائل پر غوراور فیصلے کیے گئے۔
موصولہ رپورٹ کے مطابق اس میٹنگ کے مقامی عوام کے علاوہ پرگتی بندھوسو سہایا سنگھااورکٹا ویرایووکا سنگھا کے لیڈروں نے شرکت کی۔حاضرین نے نیشنل ہائی وے کی توسیع کے سلسلے میں غور کرتے ہوئے یہ فیصلہ کیا کہ منکولی میں ایک سرکل کی تعمیر لازمی طور پر کی جانی چاہیے۔اس کے علاوہ منکولی کا رگھوناتھ روڈ تلاند دیہات کو جوڑنے والااہم راستہ ہے۔اور اسے ہر حالت میں رابطے کے طور پرباقی رکھنا ضروری ہے۔اس سے پہلے کونکن ریلوے لائن کی وجہ سے تلاندجانے والوں کے لئے آج تک بڑی دشواریوں کا سامنا درپیش ہے۔ صرف چار میٹر کا راستہ کراس کرکے تلاند پہنچنے کے لئے ریلوے لائن کی وجہ سے ایک کلو میٹر کا فاصلہ طے کرنا پڑتا ہے۔اب ہائی وے کے تعمیری کام کی وجہ سے دوبارہ مزید مسائل پید اہونے امکانات ہیں۔اور اگر ایساہوگا تو پھر مقامی باشندے اس کے خلاف سخت احتجاجی مظاہرے کے لئے اٹھ کھڑے ہونگے۔
پینے کے پانی کی قلت پر گفتگو کرتے ہوئے کہا گیا کہ گزشتہ اس علاقے میں پانی کے شدید مسائل پید اہوگئے تھے اس لئے امسال گرمی کا موسم اور پانی قلت شروع ہونے سے پہلے ہی اس مسئلے کو حل کرلینا چاہیے۔ غور وخوض کے بعد فیصلہ کیا گیا کہ پانی کا بنیادی ذریعہ یہاں سے گزرنے والی چھوٹی سی نہر ہے جس پر ایک چھوٹا ساپُل تعمیر کیا ہے۔ اب اس پُل کے قریب ہی ایک بند تعمیر کرکے پانی کو اسی علاقے میں ذخیرہ کیا جائے۔یہ مسئلہ بھی سامنے آیا کہ نہر کے اندر کیچڑ اور کچرا بہت زیادہ بھر گیا ہے اس لئے اس کو صاف کیے بغیر نہر پر بند باندھنے سے زیادہ فائد نہیں ہوا۔ طے کیا گیا کہ 8دسمبر کو اتوار کے دن صبح 6.30بجے اس علاقے کے تمام باشندے اپنے طور پر خود ہی بند باندھنے کے کام میں حصہ لیں گے۔
نہر پر واقع پُل کے سلسلے میں غور کرنے کے بعد طے کیا گیا کہ چونکہ یہ پُل بہت ہی تنگ اور انتہائی خستہ حالت میں ہے، اس لئے مزید چوڑا پُل تعمیر کرنے کے لئے جد وجہد کی جائے۔ عوام کا کہنا تھا کہ اس سے پہلے اس پُل کے تعلق سے منتخب عوامی نمائندوں کی توجہ کئی مرتبہ اس مسئلے کی طرف مبذول کرائی گئی ہے مگر کسی نے اسے حل کرنے کی کوشش نہیں کی۔ اب اس سلسلے میں پوری سنجیدگی کے ساتھ اس پُل کی تعمیر کے لئے جد وجہد شروع کی جائے۔
اس میٹنگ میں منکولی ابھیرودی سمیتی کے جنرل سیکریٹری ناگ راج نائک، نائب صدر رامناتھ بلیگار، تلاند پرگتی بندھو سمیتی کے لیڈر رویندرآر نائک، دیویندرا نائک، ائرپا نائک،کرشنا نائک، نرسمہا نائک، راجو سنکپا نائک، ماروتی این نائک، وینکٹیش نائک وغیرہ موجود تھے۔
